“`html
Tiranë-Durrës: Tender prej 15.7 milionë euro për zgjatjen e linjës hekurudhore deri në Stacionin Qendror të Tiranës
Hekurudha Shqiptare ka shpallur një tender me vlerë rreth 1.5 miliardë lekë (afërsisht 15.7 milionë euro) për realizimin e projektit të zgjatjes së linjës hekurudhore nga Terminali i Transportit Publik deri në Stacionin Qendror të Trenit në Tiranë.
Ky kontratë, e tipit “çelësa në dorë”, parashikon një zgjatim prej 4 kilometrash të linjës ekzistuese Durrës–Tiranë, me qëllim integrimin e transportit urban me rrjetin hekurudhor kombëtar.
Tenderi përfshin gjithashtu:
- Ndërtimin e dy ndalesave të ndërmjetme, të quajtura Tirana 1 dhe Tirana 2, për të rritur aksesin dhe lidhjen me rrjetet lokale të transportit publik.
- Përfundimin e punimeve të mbetura për urën mbi Unazën e Tiranës, e cila do të shtrihet mbi një hapësirë prej 71 metrash.
Sipas dokumenteve të tenderit, kontrata përfshin gjithashtu rehabilitimin e rrugëve lokale të prekura nga punimet, si asfaltimi, zgjerimi dhe ndërtimi i trotuareve. Po ashtu, do të vendosen barriera sigurie dhe zgjidhje për reduktimin e zhurmës.
Linja do të elektrifikohet dhe do të pajiset me sinjalistikë dhe sistem telekomunikimi të integruar me pjesën ekzistuese të linjës Durrës–Tiranë.
Dokumentet theksojnë se “Seksioni në studim (PTT–TCC) fillon me një kthesë me rreze 1000 m dhe mbyllet me një segment të drejtë në stacionin Tirana CCS. Nga Tirana PTT deri në Tirana CCS, shpejtësia është 70-100 km/orë, me një rreze minimale në km 36+420, prej 150 m. Megjithatë, grupi i ekspertëve të Hekurudhës Shqiptare, përmes skicave të ideve të propozuara, lënë mundësinë e rishikimit të kësaj rrezeje dhe mbajtjen e rrezes ekzistuese të gjurmës hekurudhore prej 300m.”
Projekti për linjën Tiranë-Durrës dhe zgjatimin në Rinas ka nisur zbatimin në vitin 2021 dhe është ende në proces e sipër, pa një datë të saktë përfundimi.
Linja është projektuar për shpejtësi prej 70–100 km/orë, me mundësi rishikimi të rrezeve minimale për optimizimin e rutës dhe përputhjen me gjurmën ekzistuese.
“`