Shqipëria ngjitet 8 vende në renditjen globale StartupBlink 2026
Shqipëria ka shënuar një ngritje të konsiderueshme, duke u renditur si ekosistemi i 4-t më në rritje në Evropë dhe i 75-ti në botë, sipas Raportit Global të Ekosistemit të Startup-eve 2026. Ky raport, i publikuar nga StartupBlink, organizata më gjithëpërfshirëse globale për hartën e ekosistemeve të startup-eve, tregoi një avancim prej tetë vendesh për Shqipërinë. Ky progres është i barabartë me rritjen më të madhe mes vendeve evropiane dhe i treti më i madhi në nivel global, duke rikthyer Shqipërinë në top 80-tëshin e ekosistemeve botërore.
Vendi regjistroi një rritje vjetore prej 71.1% të ekosistemit, duke u pozicionuar kështu në vendin e katërt në Evropë për këtë tregues. Vlera totale e ekosistemit shqiptar të startup-eve arrin aktualisht 606.4 milionë dollarë amerikanë.
Detaje nga raporti:
- Renditja globale: #75 (+8 vende krahasuar me vitin 2025)
- Rritja vjetore e ekosistemit: +71.1% (e 4-ta më e larta në Evropë)
- Tirana: Ngjitet 17 vende me +40.5% rritje, duke u renditur e treta për rritje mes qyteteve ballkanike në top 500-tëshin botëror.
- Indeksi i Mjedisit të Biznesit për Inovatorët: #60 nga 125 vende.
- Ndryshimet kryesore për vitin 2026: Top 5 në Ballkan për Mbështetje të Startup-eve dhe Funksionimin e Ekosistemit.
Raporti thekson se renditja e Shqipërisë në Indeksin e Mjedisit të Biznesit për Inovatorët (vendi i 60-të) tregon praninë e kushteve të forta themelore të biznesit, të cilat duhen përkthyer plotësisht në rezultate të ekosistemit, duke treguar kështu një potencial të mëtejshëm rritjeje me pjekurinë e ekosistemit.
Delina Ibrahimaj, Ministre e Ekonomisë dhe Inovacionit, vlerësoi këtë arritje, duke thënë: “Ky rezultat konfirmon se investimi i Shqipërisë te inovacioni dhe startup-et po jep fryte. Ngjitja tetë vende brenda një viti, me rritjen e katërt më të lartë në Evropë, tregon se reformat, investimi publik dhe besimi i themeluesve dhe investitorëve tanë po lëvizin në të njëjtin drejtim. Ne do të vazhdojmë të harmonizojmë financimin, fondet e BE-së dhe infrastrukturën me nevojat reale të ekosistemit, duke përfshirë prioritetin strategjik për ndërtimin e qendrave startup përtej Tiranës.”
Ky përmirësim vjen në një kohë kur Innovation4Albania, e themeluar nga bashkimi i Startup Albania dhe Agjenicsë së Inovacionit dhe Eskelencës, po përfundon ciklin e saj të parë të plotë të granteve. Ky program tërhoqi 1,179 aplikantë në vitin 2026 dhe mbështeti një portofol ku 40.6% ishin sipërmarrje të udhëhequra nga gra.
Tirana mbetet i vetmi qytet shqiptar i renditur në raport. Zhvillimi i qendrave shtesë startup jashtë kryeqytetit është identifikuar si një prioritet strukturor kyç për fazën e ardhshme të zhvillimit të ekosistemit.
Raporti Global i Ekosistemit të Startup-eve 2026 i StartupBlink rendit 1,000 qytete dhe 125 vende sipas forcës së ekosistemit të startup-eve, duke përdorur tregues të sasisë, cilësisë dhe mjedisit të biznesit. Faqja e plotë për Shqipërinë është e disponueshme në startupblink.com.