Irani: Goditëm dhe shkatërruam bazën ajrore amerikane. Nëse agresioni përsëritet…
Garda Revolucionare e Iranit njoftoi se Forca e saj Hapësinore-Ajrore goditi dhe shkatërroi bazën ajrore nga ku forcat amerikane kishin nisur një sulm ndaj një kulle telekomunikacioni në ishullin Sirik, në provincën iraniane të Hormozganit. Deklarata pretendon se të gjitha objektivat e planifikuara janë shkatërruar.
Kështu raportoi agjencia iraniane e lajmeve Mehr News Agency në rrjetin social X. Në një deklaratë të shpërndarë nga zyra e saj e shtypit, IRGC bëri të ditur se vetëm pak orë pas sulmit amerikan ndaj kullës së komunikimit në ishullin Sirik, avionët luftarakë të Forcës Hapësinore-Ajrore të Gardës Revolucionare morën në shënjestër bazën nga ku ishte nisur operacioni dhe e përfunduan me sukses misionin.
Më tej, Forca Hapësinore-Ajrore e IRGC-së lëshoi një paralajmërim të drejtpërdrejtë:
- “Nëse agresioni përsëritet, përgjigjja do të ketë një shkallë dhe natyrë krejtësisht të ndryshme.
- Përgjegjësia e plotë për çdo përshkallëzim do t’i takojë Shteteve të Bashkuara”.
Ishulli Sirik ndodhet në provincën e Hormozganit, në jug të Iranit, pranë ngushticës së Hormuzit.