“`html
Tmerr në një spital në Siri: Organet e të burgosurve hiqeshin gjallë
Një histori e rëndë ka dalë në dritë nga Siria. Sipas raportimeve, mëlçia e një të burgosuri është hequr me forcë në Spitalin Ushtarak Tishreen, gjatë kohës kur regjimi i Bashar al-Assad ishte në fuqi.
Mjekë të pranishëm në një gjyq kanë rrëfyer se mëlçia e një të burgosuri është hequr dhe transplantuar te një tjetër person, me urdhër të zyrtarëve të lartë të regjimit. Si i burgosuri, ashtu edhe ushtari që iu nënshtrua transplantit, kanë humbur jetën pas procedurës mjekësore.
Ministria Siriane e Drejtësisë ka publikuar pamje filmike nga marrja në pyetje e oficerëve të lartë mjekësorë, të cilët dyshohet se kanë kryer krime në Spitalin Ushtarak Tishreen gjatë regjimit të Asadit.
Në një nga videot, Gjenerali i Brigadës al-Yaqzan Ahmed Hassan, i cili e ka marrë përgjegjësinë direkte për operacionin, deklaron: “Me udhëzimet e Gjeneral Major Ammar Suleiman, Drejtor i Shërbimeve Mjekësore, unë, së bashku me ndihmësin tim Dr. Taysir Salih dhe anesteziologun Ali, kryem transplantin e mëlçisë.” Ai ka shtuar se ekipi kirurgjikal përfshinte kirurgë të mëlçisë dhe anesteziologë, duke përmendur emrat e tyre: Dr. Yaser Saleh, Dr. Saleh Hasan Yusuf, Dr. Haydar Suleiman Ahmed, Dr. Ali al-Ali dhe Dr. Wail Sayyuh.
Hassan ka konfirmuar se i burgosuri, të cilit i është hequr mëlçia, ka vdekur menjëherë pas operacionit. Ndërsa ushtari që iu nënshtrua transplantit, ka zhvilluar komplikacione dy ditë më vonë dhe, pavarësisht një operacioni tjetër, ka ndërruar jetë rreth një javë më pas.
Një tjetër i pandehur në gjyq, gjeneral brigade Ibrahim Abbas Yezbek, ka deklaruar se Ammar Suleiman merrte urdhra vetëm nga Bashar al-Assad dhe vëllai i tij Maher al-Assad.
Krejt në fund, Koloneli Ahmed Mahmoud al-Khatib, ish-kreu i Njësisë së Kujdesit Intensiv, ka sqaruar se personi të cilit i është hequr mëlçia, ishte mbajtur në Degën e 215-të të Inteligjencës Ushtarake dhe se para operacionit shëndeti i tij ka qenë i mirë dhe shenjat jetësore të qëndrueshme.
Prokurori i Përgjithshëm sirian, Hassan al-Turba, në një deklaratë për stacionin televiziv al-Ikhbariya, ka theksuar se Spitali Ushtarak Tishrin nuk ka qenë një institucion shëndetësor i zakonshëm, por “vepronte si një aneks i shërbimeve sekrete dhe shumë krime janë kryer brenda ambienteve të tij”. Ai ka shtuar se spitali ishte nën kontrollin e oficerëve të lartë dhe se Bashar al-Assad dhe vëllai i tij Maher al-Assad ishin të përfshirë në këtë krim. Ndërkohë, ende nuk është identifikuar i burgosuri të cilit i është hequr mëlçia, pasi informacioni është marrë nga stafi që ka punuar më parë aty dhe që më pas është larguar.
“`