“`html
Shqipëria ka çmimin më të lartë të paketës bazë të internetit celular në Rajon
Shqipëria përballet me koston më të lartë të internetit nga rrjetet celulare, në raport me të ardhurat, krahasuar me vendet e tjera të rajonit të Ballkanit Perëndimor.
Sipas të dhënave të Uninionit Ndërkombëtar të Telekomunikacioneve (ITU), të cituara nga Autoriteti i Komunikimeve Elektronike dhe Postare (AKEP), kosto mesatare e shportës mujore të internetit me brez të gjerë për vitin 2025 në Shqipëri arrinte në 1.69% të të ardhurave mujore bruto (GNI). Me këtë nivel, Shqipëria renditet dukshëm lart, duke tejkaluar vendet e tjera të rajonit dhe mesataren botërore.
Pas Shqipërisë, renditet Maqedonia e Veriut me 1.31% të GNI, e ndjekur nga Bosnje-Hercegovina me 1.17%, Mali i Zi me 1.01% dhe Serbia me 0.96%. ITU nuk disponon të dhëna për Kosovën.
Shqipëria ka kosto dukshëm më të larta se mesatarja Botërore prej 1.38% të GNI.
Për sa i përket shportës së komunikimit me përdorim të lartë (e cila përfshin 140 minuta, 20 SMS dhe 5GB), Shqipëria pozicionohet pranë niveleve më të larta në rajon dhe sipër mesatares botërore, duke zënë 1.95% të GNI. Me këtë tregues, Shqipëria është vendi i dytë me kosto më të larta të kësaj pakete në Rajon, pas Maqedonisë së Veriut (2.1% të GNI). Pas Shqipërisë vijojnë Bosnje-Hercegovina me 1.86%, Serbia me 1.49% dhe Mali i Zi me 1.01%. Mesatarja botërore për këtë shportë është 1.54%.
Vlerësimi i përballueshmërisë së shërbimeve të komunikimeve elektronike në Shqipëri është realizuar në përputhje me metodologjinë e ITU, e cila mat koston e shportave standarde të TIK në raport me të ardhurat kombëtare bruto për frymë. Pragu prej 2% të GNI për banor shërben si pikë referimi për përcaktimin e përballueshmërisë së shërbimeve bazë.
Sipas analizave të AKEP, shërbimet celulare paraqiten në një situatë më të favorshme. Të gjitha shportat, qofshin ato me konsum të ulët, vetëm për internet, apo edhe ato me konsum të lartë, rezultojnë nën ose shumë pranë pragut prej 2% të GNI për frymë.
Nga ana tjetër, shporta e broadband-it fiks ka treguar një përmirësim gradual, duke zbritur nga 2.31% në vitin 2024 në rreth 2.08% në vitin 2025, duke u afruar kështu pranë pragut të përballueshmërisë dhe duke arritur një nivel më të pranueshëm.
Pas vitit 2023, konsumatorët shqiptarë po përballen me një rritje graduale të çmimeve të komunikimit, veçanërisht në segmentin celular. Kjo periudhë përkon me përqendrimin e strukturës së tregut në dy operatorë të vetëm. Pas një periudhe disavjeçare të karakterizuar nga konkurrencë e ashpër, fitime të dobëta dhe, në disa raste, çmime grabitqare, struktura e re e duopolit duket se po u mundëson operatorëve të korrigjojnë çmimet dhe të përmirësojnë parametrat e tyre financiarë.
“`