Transporti në sezonin veror: DPSHTRR promovon platformën eTransport në porte dhe aeroport
Drejtoria e Përgjithshme e Shërbimeve të Transportit Rrugor (DPSHTRR) ka nisur një fushatë informuese për promovimin e platformës eTransport. Ky shërbim digjital ofron informacion mbi transportin publik interurban, në një periudhë kur fluksi i turistëve dhe udhëtarëve drejt Shqipërisë rritet ndjeshëm.
Fushata është zhvilluar në disa nga pikat kryesore hyrëse të vendit, përfshirë:
- Portin e Durrësit
- Aeroportin Ndërkombëtar të Tiranës
- Portin e Vlorës
- Portin e Sarandës
Sipas DPSHTRR-së, ekipet e institucionit kanë informuar qytetarët, turistët dhe operatorët mbi mënyrën e përdorimit të platformës dhe funksionalitetet që ajo ofron.
Platforma eTransport synon të centralizojë informacionin për transportin publik interurban. Ajo u mundëson përdoruesve të aksesojnë të dhëna mbi linjat, itineraret dhe mënyrën e përdorimit të shërbimit në një kanal të vetëm digjital.
Gjatë takimeve në terren, DPSHTRR theksoi se ka mbledhur komente dhe sugjerime nga përdoruesit. Këto të dhëna do të shërbejnë për të identifikuar përmirësime të mëtejshme të platformës, me fokus te lehtësia e përdorimit dhe funksionaliteti.
Institucioni njoftoi se fushata do të vijojë gjatë gjithë sezonit veror edhe në pika të tjera turistike dhe kulturore. Kjo iniciativë synon promovimin e platformës dhe informimin e udhëtarëve mbi shërbimet e transportit publik interurban.