“`html
Çmimi i naftës rritet me 8 lekë, arrin 206 lekë për litër
Çmimi i naftës ka arritur në 206 lekë për litër, nga 198 lekë për litër që ishte tregtuar një javë më parë në pikat e pakicës të karburanteve. Brenda shtatë ditëve, çmimi i naftës është rritur me 8 lekë për litër.
Ndryshe nga nafta, çmimi i benzinës ka mbetur i pandryshuar, duke vijuar të tregtohet me 189 lekë për litër.
Ndryshimet e çmimit të naftës në tregun vendas po ndikohen nga çmimet në tregjet ndërkombëtare, për shkak të varësisë nga importi.
Përshkallëzimi i ri i tensioneve në Lindjen e Mesme ka sjellë rritje të re të çmimeve në bursat e huaja. Të martën, çmimi i naftës bruto arriti 91 USD për fuçi.
Presidenti i Shteteve të Bashkuara, Donald Trump, ka kërcënuar me një përshkallëzim të ri të veprimeve kundër Iranit, duke paralajmëruar se SHBA-ja së shpejti do të nisë një sulm ndaj një objekti bërthamor iranian të fortifikuar rëndë, në një kohë kur çmimet e naftës po rriten me shpejtësi.
Kërcënimi i presidentit vjen mes një përshkallëzimi të konfliktit gati pesë-mujor mes Uashingtonit dhe Teheranit, pasi ushtria amerikane përfundoi natën e dhjetë radhazi të bombardimeve dhe çmimi i naftës arriti në 91 USD për fuçi.
Zotimi i SHBA-së për veprime të reja ushtarake vjen në një kohë kur shqetësimi mes tregtarëve të naftës po rritet, pasi kalimi i naftës bruto përmes Ngushticës së Hormuzit është ngadalësuar ndjeshëm ditët e fundit dhe rezervat globale po bien në nivele kritike.
Përmes Ngushticës së Hormuzit kalon një e pesta e naftës së tregjeve botërore, dhe ndërprerja e kalimit përmes saj mund të çojë çmimin e naftës deri në 120 USD për fuçi, sipas parashikimeve të analistëve të huaj.
“`