Keydata: Çmimet e apartamenteve rriten 122% brenda 7 viteve, arrijnë gati 2.2 mijë euro/m² në mars
Çmimi mesatar i shitjes së apartamenteve në Tiranë ka arritur nivele rekord. Deri në mars 2026, çmimi mesatar për apartamentet ka shkuar në 2,141 euro/m², ndërsa çmimi median është 2,046 euro/m².
Të dhënat për ecurinë e çmimeve mesatare të apartamenteve nga viti 2005 deri në tremujorin e parë të vitit 2026 janë publikuar në indeksin “Keydata Albania” të “Çelësi Media Group”. Ky indeks përfshin një përzierje të dhënash, si çmimet e apartamenteve të rishitura dhe të reja, por shumica e tregut të pasqyruar bazohet në çmimet e apartamenteve të rishitura.
Në shtatë vite, çmimet e apartamenteve në Tiranë janë dyfishuar. Krahasuar me tremujorin e parë të vitit 2019, periudhë kur nisi përshpejtimi i rritjes, çmimet mesatare të apartamenteve në tremujorin e parë të vitit 2026 janë dy herë më të larta. Nga 964 euro/m², çmimi mesatar ka arritur në 2,141 euro/m², duke u rritur me 122%.
Në krahasim me vitin 2005, kur çmimi mesatar ishte 664 euro/m², rritja e çmimeve është rreth 222% më e lartë. Çmimi mesatar i apartamenteve në 21 vite është mbi trefishuar krahasuar me vitin 2005.
Analiza sipas zonave:
- Zona e ish-Bllokut: Çmimi mesatar i shitjes ka arritur 3,003 euro/m² në mars 2026, nga 1,574 euro/m² në tremujorin e parë të vitit 2022. Kjo përbën një rritje prej 90% në katër vite.
- Brenda Unazës së Vogël të Tiranës: Çmimi mesatar ka arritur 2,431 euro/m², nga 1,269 euro/m² në tremujorin e parë të vitit 2022. Çmimet janë rritur me rreth 92% krahasuar me katër vite më parë.
- Jashtë Unazës së Vogël: Regjistrohet një çmim mesatar prej 2,022 euro/m², nga 1,056 euro/m² në tremujorin e parë të vitit 2022. Kjo zonë shënon një rritje prej 91.4%.
Raporti tregon se indeksi i çmimit real të shitjes së apartamenteve në Tiranë për periudhën 2020-2026 ka pësuar një rritje prej 117% nga tremujori i parë 2020 deri në tremujorin e parë 2026, me vitin 2005 si bazë krahasuese (indeksi 100). Inflacioni kumulativ për të njëjtën periudhë është 77.3%.
Gjatë periudhës 2020-2026, indeksi i çmimit të shitjes ka pasur luhatje të pakta. Momentet kryesore të rritjes përfshijnë periudhën nga tremujori i tretë 2020 deri në tremujorin e dytë 2023, ku indeksi është rritur gradualisht. Një rritje më e ndjeshme vërehet nga tremujori i tretë në të katërt 2023 (21%), nga tremujori i katërt 2023 në të parin 2024 (10.09%), dhe nga tremujori i dytë në të tretë 2024 (4.19%). Tremujori i dytë 2025 ka shënuar një rritje prej 23% krahasuar me tremujorin e parë 2025, ndërsa tremujori i parë 2026 ka parë një rritje prej 9.5% krahasuar me fundin e vitit 2025.
Megjithatë, janë vënë re edhe rënie të indeksit. Këto përfshijnë periudhën nga tremujori i parë në të dytë 2020 (-2.37%), nga tremujori i dytë në të tretë 2023 (-1.04%), nga tremujori i tretë në të katërt 2024 (-2.57%), nga fundi i 2024 në fillim të 2025 (-5.26%), dhe nga tremujori i tretë në të katërt 2025 (-3.1%).
Nga tremujori i parë 2020 deri në tremujorin e parë 2026, çmimet mesatare reale të shitjes në Tiranë kanë lëvizur mes 1,030 €/m² dhe 2,141 €/m², ndërsa çmimet mediane mes 984 €/m² dhe 2,046 €/m². Në tremujorin e parë 2026, çmimet mesatare dhe mediane janë përkatësisht 2,141 €/m² dhe 2,046 €/m². Krahasuar me tremujorin e fundit 2025, çmimet mesatare reale janë rritur me 2.4% dhe çmimet mediane me 4.5%.
Duhet theksuar se çmimet mesatare, në ndryshim nga indeksi i çmimeve, llogariten në proporcion me numrin e apartamenteve në shitje. Kështu, një rritje apo rënie në çmimet mesatare nuk tregon domosdoshmërisht një ndryshim në tregun e pasurive të paluajtshme, por mund të reflektojë ndryshime në ofertë.
Analiza specifike për zonat:
- Zona brenda Unazës së Vogël: Çmimi mesatar real i shitjes ka lëvizur mes 1,128 – 2,478 €/m², ndërsa çmimet mediane mes 1,074 – 2,282 €/m². Në tremujorin e parë 2026, çmimi mesatar është 2,431 €/m² dhe çmimi median 2,282 €/m². Krahasuar me fundin e vitit 2025, çmimet mesatare janë ulur me 1.9%, ndërsa medianet janë rritur me 1.3%.
- Zona e Bllokut: Çmimet mesatare të shitjes kanë variuar mes 1,462€/m² dhe 3,003€/m², ndërsa çmimet mediane mes 1,387€/m² dhe 3,004€/m². Në tremujorin e parë 2026, çmimi mesatar është 3,003€/m² dhe çmimi median 3,004€/m². Krahasuar me tremujorin e katërt 2025, çmimet mesatare janë rritur me 1.8% dhe medianet me 9.7%.
- Zona jashtë Unazës së Vogël: Çmimet mesatare reale variojnë nga 959 €/m² në 2,022 €/m² në tremujorin e parë 2026. Çmimet mediane janë mes 930 €/m² dhe 1,951€/m². Në tremujorin e parë 2026, çmimet mesatare reale janë 2,022 €/m² dhe ato mediane 1,951€/m², duke shënuar një rritje prej 3.3% dhe 5.7% krahasuar me tremujorin e katërt 2025.