Aksident i trefishtë në rrugën Sarandë-Ksamil, plagosen dy turistë spanjollë
Një aksident i rëndë automobilistik, ku u përfshinë tre automjete, ka ndodhur mesditën e së enjtes në rrugën nacionale Sarandë–Ksamil, pranë zonës së njohur si Manastiri.
Si pasojë e përplasjes, dy shtetas spanjollë, të cilët ndodheshin në Sarandë për pushime, kanë mbetur të plagosur.
Menjëherë pas ngjarjes, në vendngjarje kanë mbërritur ambulanca dhe shërbimet e policisë. Ata kanë ndihmuar në transportimin e personave të dëmtuar dhe në rivendosjen e normalitetit në qarkullim.
Të plagosurit janë identifikuar si Jove Pibrall Jove, 24 vjeç, dhe Catia Picac, 37 vjeçe. Ata u dërguan fillimisht në Urgjencën e Spitalit të Sarandës.
Mjekët kanë raportuar se 24-vjeçari ka pësuar dëmtime në pjesën e mesit. Për shkak të gjendjes së tij, ai është transportuar me ambulancë drejt Spitalit Universitar të Traumës në Tiranë për trajtim të specializuar.
Ndërkohë, 37-vjeçarja ka marrë dëmtime në kokë dhe po trajtohet në Spitalin e Sarandës. Ajo aktualisht është jashtë rrezikut për jetën.
Policia po vijon hetimet për të zbardhur shkaqet e këtij aksidenti. Deri më tani, nuk ka informacione zyrtare mbi rrethanat që çuan në përplasjen e tre automjeteve.
Aksidenti ka shkaktuar edhe dëme të konsiderueshme materiale.