Pronat për banim të konfiskuara, 75% ndodhen në Tiranë
Rreth 50 milionë euro është vlera totale e pasurive të paluajtshme për banim të konfiskuara, të cilat aktualisht administrohen nga Agjencia e Administrimit të Pasurive të Sekuestruara dhe të Konfiskuara (AAPSK). Në total, numri i pasurive të paluajtshme nën administrimin e kësaj agjencie ka arritur në 345 prona.
Të dhënat e bëra publike nga AAPSK për median “Monitor” tregojnë se pjesa më e madhe e vlerës së këtyre pronave është përqendruar në kryeqytet. Rreth 75% e vlerës totale të pronave rezidenciale të konfiskuara, ose rreth 3.4 miliardë lekë, ndodhen në Tiranë, nga një vlerë totale prej 4.6 miliardë lekësh.
Pas Tiranës, pjesën më të madhe të vlerës së pronave të sekuestruara e zënë Durrësi dhe Fieri, me rreth 9% secili të vlerës totale. Qytetet e Elbasanit dhe Kavajës përfaqësojnë rreth 2% secili të vlerës së pronave të konfiskuara. Në Sarandë dhe Berat, pesha e pronave të sekuestruara është rreth 1% për secilin qytet. Pjesa tjetër shpërndahet në qytete të tjera, me vlera më të ulëta.
Për pasuritë e ndodhura në Himarë, vlera nuk mund të përcaktohet. Kjo ndodh pasi vendimet e sekuestrimit nuk përmbajnë të dhëna rreth sipërfaqes së pasurive, një element i domosdoshëm për vlerësimin ekonomik të tyre.
Vendosja e masës së sekuestros mbi një pasuri nuk është kompetencë e AAPSK-së. Kjo procedurë rregullohet nga Kodi i Procedurës Penale dhe legjislacioni i posaçëm në fuqi. AAPSK angazhohet në administrimin e pasurisë vetëm pasi ajo i kalon për administrim, sipas procedurave ligjore.
Në përputhje me Ligjin nr. 34/2019, të ndryshuar, AAPSK merr në dorëzim pasuritë e sekuestruara mbi bazën e vendimeve përkatëse. Konkretisht, neni 16 i ligjit parashikon marrjen në dorëzim të pasurisë së sekuestruar bazuar në vendimin e gjykatës ose urdhrin e prokurorit. Neni 17 përcakton procedurat për marrjen në administrim të pasurive të sekuestruara me urdhër të organit administrativ kompetent.
Pas marrjes në administrim, AAPSK ka përgjegjësi për ruajtjen, mirëmbajtjen dhe administrimin e pasurisë, duke synuar mbrojtjen dhe, kur është e mundur, rritjen e vlerës së saj ekonomike.
Për vitin 2025, sipas të dhënave të Strukturës së Posaçme Kundër Korrupsionit dhe Krimit të Organizuar (SPAK), vlera e aseteve të sekuestruara dhe të konfiskuara arriti 43.5 milionë euro. Vlera e aseteve të sekuestruara është 50% më e ulët sesa në vitin 2024. 66% e tyre, ose 28.8 milionë euro, përfaqësojnë pasuri të sekuestruara në kuadër të Kodit të Procedurës Penale. Ndërsa pjesa tjetër, 34%, ose 14.7 milionë euro, u përket pasurive të sekuestruara në kuadër të ligjit Antimafie.
Në vazhdën e luftës kundër korrupsionit dhe krimit të organizuar për vitin 2025, SPAK arriti të sekuestrojë dhe konfiskojë një portofol të diversifikuar asetesh, përfshirë edhe 145 pasuri të paluajtshme.
Për vitin 2026, në mesin e muajit qershor, SPAK gjithashtu njoftoi goditjen e një grupi ndërkombëtar kriminal, të cilit iu sekuestrua një numër i konsiderueshëm pasurish të paluajtshme, përfshirë troje, apartamente, garazhe, vila, llogari bankare, shoqëri tregtare dhe pasuri të lidhura me projekte ndërtimi në Tiranë dhe zona bregdetare.