“Unë jam Jezusi!”/ Kaos në një resort në Hawaii, 20-vjeçari vret rojen e sigurisë
Një ngjarje e rëndë ka tronditur Maui-n në Hawaii, ku një roje sigurie 63-vjeçar u gjet i pajetë në një resort plazhi. Për vrasjen është arrestuar një student dhe kampion noti 20-vjeçar.
Sipas autoriteteve, kamerat e sigurisë kanë filmuar Legend Storer, i cili rreth orës 01:45 të mëngjesit dyshohet se po lëvizte pa rroba në ambientet e resortit dhe më pas u drejtua drejt zyrës së sigurisë.
Brenda zyrës ndodhej roja Dyer, 63 vjeç, i cili po pushonte gjatë turnit dhe po hante një hamburger. Hetuesit dyshojnë se Storer hyri me forcë në zyrë dhe e sulmoi atë për vdekje, duke përdorur edhe një enë të madhe uji me kapacitet rreth 19 litra.
“Ai ishte një person i mrekullueshëm. Thjesht ishte ulur në tavolinën e tij duke ngrënë një hamburger me djathë gjatë pushimit”, tha një koleg i viktimës. Sipas tij, 63-vjeçari ishte i martuar, ndërsa bashkëshortja e tij punonte në një restorant lokal.
Pas sulmit, 20-vjeçari dyshohet se u largua nga resorti. Rreth dy orë më vonë, policia mori telefonata nga banorët për një burrë të zhveshur që endej në një lagje aty pranë dhe bërtiste vazhdimisht fraza fetare. Një banor tha se kishte dëgjuar burrin të bërtiste: “Jezusi të do. Jezusi jam unë. Unë jam Jezusi.”
Policët e gjetën Storer me gërvishtje në trup dhe e dërguan në spital për vlerësim. Disa orë më vonë, rreth orës 05:30, autoritetet gjetën trupin e pajetë të rojes në zyrën e sigurisë.
Sipas policisë, lidhja e 20-vjeçarit me ngjarjen u zbulua pas shqyrtimit të pamjeve të kamerave të sigurisë. Storer, student dhe atlet i Concordia University Irvine, është akuzuar për vrasje të shkallës së dytë, vjedhje me thyerje me një objekt të rrezikshëm dhe ekspozim të pahijshëm. Ai është deklaruar i pafajshëm në paraqitjen e parë para gjykatës.
Gjykata i ka mohuar lirimin me kusht dhe 20-vjeçari vijon të mbahet në paraburgim në Qendrën Korrektuese Maui.