Tërmeti në Kolumbi: Pamje prekëse nga pasojat, infermierët kujdesen për të porsalindurit në rrugë
Një tërmet i fuqishëm me magnitudë 7.4 ka goditur Kolumbinë, duke shkaktuar viktima dhe dëme të mëdha materiale, përfshirë shembjen e disa ndërtesave. Lëkundjet e forta u ndjenë në një pjesë të konsiderueshme të Amerikës Latine, nga Ekuadori deri në Panama.
Epiqendra e tërmetit ishte pranë San José del Palmar, në provincën Chocó, në një thellësi prej rreth 96 kilometrash dhe rreth 300 kilometra larg Bogotás. Qytetet Cali, Pereira, Armenia dhe Manizales u prekën nga lëkundjet. Në Manizales, raportohet shembja e kullës së një katedraleje.
Situata më e rëndë është raportuar në Cali, ku një spital universitar është dëmtuar rëndë. Reparti pediatrik dhe njësia e kujdesit intensiv janë prekur nga shembja e një pjese të strukturës. Ekipet e emergjencës po punojnë për nxjerrjen e personave të bllokuar nën rrënoja.
Drejtoresha e spitalit, Irne Torres, e përshkroi situatën si “një dramë brenda një drame”. Sipas saj, të paktën një pacient ka humbur jetën, ndërsa rreth 10 persona dyshohet se ndodhen ende nën rrënoja. Ajo shtoi se numri i viktimave mund të rritet.
“Shembja preku 30% të strukturës dhe, në veçanti, repartet pediatrike dhe të kujdesit intensiv. Në këtë moment, ne e dimë se ka të paktën 10 persona të bllokuar dhe mund të konfirmojmë të paktën një vdekje, por kemi frikë se mund të ketë deri në pesë,” deklaroi Torres për Radio Caracol.
Spitali nuk është më në gjendje të presë pacientë të rinj. Të gjithë pacientët e shtruar janë zhvendosur në ambientet e jashtme për shkak të dëmeve të strukturës. Autoritetet kanë kërkuar gjithashtu ndihmë me furnizime gjaku për të përballuar situatën.
Ekipet e shpëtimit vijojnë kërkimet nën rrënoja, ndërsa autoritetet po vlerësojnë përmasat e dëmeve dhe numrin e viktimave. Fatkeqësia natyrore ka goditur Kolumbinë në një moment të ndjeshëm politik, vetëm pak ditë pas marrjes së detyrës nga presidenti i ri.
Një mjek, Dr. Juan Gallego, shkroi në Instagram menjëherë pas tërmetit:
- “Kushdo që mund të vijë të ndihmojë, ju lutemi të vijë në klinikën Valle Salud. Kam shumë pacientë të kujdesit intensiv të bllokuar. Duhet t’i nxjerrim jashtë. Spitali është shembur.”