“Do të ketë pasoja”: Rusia kërcënon Britaninë pas përdorimit të dronëve britanikë nga Ukraina
Rusia ka akuzuar Mbretërinë e Bashkuar se po zgjedh “qëllimisht një përshkallëzim të krizës në Ukrainë”, pasi u konfirmua se dronë të prodhuar në Britani janë përdorur në sulmet ukrainase ndaj objektivave në territorin rus.
Ambasada ruse në Londër deklaroi se Britania po vepron si “bashkëpunëtore dhe bashkëkryerëse” e sulmeve, duke paralajmëruar se përfshirja e saj në konflikt do të sjellë pasoja.
“Veprimet e Londrës në mënyrë të pashmangshme do të sjellin pasoja për të cilat ajo do të duhet të përgjigjet”, thuhet në deklaratën e ambasadës ruse. Moska paralajmëroi gjithashtu se sa më e thellë të jetë përfshirja britanike në luftë, “aq më i lartë do të jetë çmimi që do të paguajë”.
Në përgjigje, një zëdhënës i Ministrisë britanike të Mbrojtjes tha se Mbretëria e Bashkuar qëndron “krah për krah” me Ukrainën dhe mbetet e vendosur për t’i ofruar Kievit pajisjet e nevojshme për t’u mbrojtur nga pushtimi rus.
“Rusia nuk duhet të ketë asnjë dyshim për vendosmërinë e kësaj Qeverie për t’i bërë ballë agresionit rus, në Ukrainë dhe kundër Mbretërisë së Bashkuar dhe aleatëve tanë”, deklaroi zëdhënësi.
Sipas BBC, dronët në fjalë janë prodhuar nga dy kompani britanike dhe janë përdorur në sulme brenda Rusisë kundër objektivave ushtarake dhe industriale, përfshirë rafineri dhe qendra logjistike. Një burim ushtarak i cituar nga BBC konfirmoi përdorimin e dronëve britanikë dhe pretendoi se sulmet kanë shkaktuar dëme ekonomike që kapin më shumë se 35 miliardë paund.
Zëdhënësja e Ministrisë së Jashtme ruse, Maria Zakharova, tha gjithashtu se dronë që përdorin komponentë dhe konfigurime britanike janë përdorur kundër territorit rus, përfshirë një depo karburanti në rajonin e Rostovit.
Paralajmërimi i Moskës vjen pas një vale të re sulmesh me dronë nga Ukraina. Zyrtarët rusë thanë se qindra dronë u drejtuan drejt zonave pranë Moskës, ndërsa mbrojtja ajrore ruse pretendoi se kishte rrëzuar një pjesë të madhe të tyre.
Në një tjetër sulm gjatë natës, autoritetet ruse raportuan nëntë viktima dhe 23 të plagosur, mes tyre edhe një fëmijë. Ndërkohë, gjatë fundjavës, Ukraina thuhet se lëshoi rreth 822 dronë drejt objektivave në Rusi, rreth 600 prej të cilëve dyshohet se kishin si objektiv Moskën. Autoritetet ruse raportuan shtatë viktima në të gjithë vendin.
Në të njëjtën periudhë, sulmet ruse ndaj Ukrainës shkaktuan të paktën shtatë viktima dhe plagosën më shumë se 39 persona.
Britania e Madhe ka rritur ndjeshëm mbështetjen ushtarake për Ukrainën që prej nisjes së pushtimit rus në shkallë të plotë në shkurt 2022. Në prill, Ministria britanike e Mbrojtjes njoftoi një paketë të re, e cila përfshin dhjetëra mijëra dronë, mes tyre edhe sisteme sulmuese me rreze të gjatë veprimi.
Ndërsa lufta vijon në vitin e pestë, përfshirja e teknologjisë dhe armëve perëndimore në sulmet brenda territorit rus po rrit tensionet mes Moskës dhe aleatëve të Ukrainës.