Një person ka humbur jetën dhe dy oficerë të Policisë Shtetërore të Pensilvanisë janë plagosur pas një përplasjeje ajrore mes një avioni të vogël dhe një helikopteri policie, e cila ndodhi mbrëmjen e së mërkurës në Aeroportin Carlisle, në Qarkun Cumberland të Pensilvanisë.
Sipas Administratës Federale të Aviacionit (FAA), në aksident u përfshinë një avion tip Cessna 150 dhe një helikopter Bell 407 i Policisë Shtetërore. Viktima është piloti i avionit Cessna, i cili dyshohet të ketë qenë personi i vetëm në bord dhe humbi jetën në vendngjarje.
Të dy pilotët e helikopterit, të cilët janë pjesë e njësisë elitare të aviacionit të Policisë Shtetërore të Pensilvanisë, mbetën të plagosur, por nuk janë në rrezik për jetën.
Sipas informacioneve paraprake, helikopteri, me bazë në Harrisburg, po zhvillonte një stërvitje rutinë dhe qëndronte pezull disa metra mbi tokë, në një zonë me bar. Në atë moment, avioni Cessna 150 iu afrua nga pas dhe u pozicionua pranë njërës prej pistave. Për arsye ende të panjohura, avioni ndryshoi drejtim në momentin e fundit dhe goditi helikopterin nga pas.
Pas përplasjes, helikopteri u përmbys dhe u rrëzua në tokë. Të dy pilotët, pasi mbetën fillimisht të bllokuar brenda, arritën të dilnin.
Në vendngjarje mbërritën zyrtarë të FAA-së, ndërsa hetuesit e Bordit Kombëtar të Sigurisë së Transportit (NTSB) kanë nisur punën për të përcaktuar shkaqet e aksidentit. Hetimi pritet të fokusohet në manovrat e avionit të vogël, komunikimin mes ekuipazheve dhe kushtet e sigurisë në aeroport në momentin e përplasjes.