Doganat dialog me operatorët ekonomikë për zbatimin e sistemit të përmirësuar të pullave fiskale
Drejtoria e Përgjithshme e Doganave po zbaton prej 1 korrikut 2026 një sistem të përmirësuar të pullave fiskale. Ky sistem parashikon identifikim unik digjital për çdo pullë, aktivizim elektronik dhe gjurmim të produkteve që i nënshtrohen akcizës.
Në një takim të zhvilluar me përfaqësues të ALBTrace CO sh.a. dhe operatorë ekonomikë nga sektorët e duhanit, pijeve alkoolike dhe produkteve të tjera subjekt akcize, Doganat diskutuan çështjet praktike lidhur me furnizimin, përdorimin, aktivizimin dhe verifikimin e pullave.
Drejtori i Përgjithshëm i Doganave, Besmir Beja, theksoi se modernizimi i administrimit të pullave fiskale synon të sjellë “më shumë eficiencë në proceset e operatorëve ekonomikë dhe forcim të kontrollit e të gjurmueshmërisë së produkteve subjekt akcize”.
Sistemi i ri kombinon elementet fizike të sigurisë me teknologjinë digjitale. Çdo pullë fiskale pajiset me një identifikues unik, i cili lidhet me të dhënat e produktit. Kjo mundëson “gjurmimin, monitorimin dhe verifikimin e produkteve gjatë gjithë ciklit të tyre të qarkullimit”.
Proceset e administrimit të pullave, nga parashikimi dhe porositja deri te aktivizimi dhe monitorimi, do të kryhen në mënyrë digjitale. Aktivizimi realizohet nëpërmjet aplikacionit web dhe aplikacionit mobil, të cilat janë të integruara me sistemin qendror.
Për pullat e furnizuara në rul, operatorët mund të kryejnë aktivizimin duke skanuar pullën e parë dhe të fundit të një intervali, ose duke identifikuar intervalin. Përdorimi i pullave regjistrohet më pas në sistem dhe lidhet me produktet ku janë aplikuar.
Operatorët ekonomikë ngritën gjatë takimit çështje të lidhura me “formatin dhe procesin e furnizimit me pulla, dëmtimet gjatë përdorimit, identifikimin e produkteve dhe funksionalitetet e aktivizimit e të verifikimit”, sipas njoftimit të Doganave.
Sistemi ndryshon edhe mënyrën e furnizimit me pullat fiskale për duhanin. ALBTrace CO sh.a. ofron tashmë pullat të prera dhe të gatshme për aplikim, në vend që prerja të kryhej nga operatorët nëpërmjet palëve të treta. Ky ndryshim “eliminoi nevojën për përpunim të mëtejshëm, reduktoi kohën dhe kostot operative dhe siguroi një proces më të standardizuar dhe më efikas”.
Kuadri i ri gjithashtu u jep konsumatorëve mundësinë të kontrollojnë autenticitetin e produkteve subjekt akcize përmes aplikacionit publik ALBConnect. Duke skanuar identifikuesin unik të pullës, përdoruesi mund të verifikojë në kohë reale autenticitetin e produktit dhe të raportojë raste të dyshimta ose produkte potencialisht të falsifikuara.
Drejtoria e Përgjithshme e Doganave do të mbikëqyrë sistemin, duke përfshirë miratimin e porosive të pullave dhe kontrollin e kërkesave ligjore. Sipas kuadrit të ri, porositë duhet të miratohen nga autoriteti doganor brenda dy ditëve pune nga marrja e tyre, nëpërmjet Sistemit të Gjurmueshmërisë dhe Kontrollit të ALBTrace.
Doganat njoftuan se do të vijojnë monitorimin e sistemit dhe dialogun me operatorët, si dhe do të ofrojnë trajnime për subjektet që hasin vështirësi në aktivizimin e pullave fiskale.