“`html
Tenderë të Paracaktuar për “Tigrat”: Petrolifera Fiton me Negocim 5.2 Milionë Euro për Transportin e Naftës
Shteti shqiptar vijon të shpenzojë miliona euro në mënyrë tepër të dyshimtë dhe pa garë, duke i akorduar ato për operimin e dy “karakatinave” të vendosura në zonën e Triportit, Vlorë. Këto objekte, të quajtura “TEC Lundrues”, u sollën disa vite më parë dhe kanë kushtuar një shumë të konsiderueshme parash.
Sipas Vox News, brenda një periudhe të shkurtër, Korporata Elektroenergjitike Shqiptare (KESH) ka hapur disa tendera me vlerë dhjetëra miliona euro për mirëmbajtjen dhe transportin e lëndës djegëse. Mënyra e zhvillimit të këtyre procedurave ngre dyshime të forta.
Nuk bëhet fjalë për tendera të mirëfillta, por më tepër për procese negociimi me firmat që operojnë në treg. Këto firma marrin ftesa për ofertë, dhe më pas përpiqet të ulet vlera e tyre.
Fondi limit i procedurës për të cilën bëhet fjalë ka qenë 493.960.000 lekë. Kompania fituese, “LA PETROLIFERA ITALO ALBANESE”, ofroi 493.699.040 lekë, ose 99.95% të fondit limit. Ulja e vlerës në këtë procedurë ishte vetëm 260.960 lekë të reja.
Procedura duket të jetë zhvilluar tërësisht në favor të Petroliferës, e cila brenda një kohe të shkurtër, që nga vendosja e këtyre objekteve në Vlorë, ka përfituar dhjetëra miliona euro.
Objekti i kontratës është “depozitimi dhe ngarkim-shkarkimi i lëndës djegëse për TEC Lundrues, Vlorë”, me një kohëzgjatje 19 muaj. Kriteri i përzgjedhjes, çuditërisht, ka qenë “oferta ekonomikisht më e favorshme bazuar në çmim”. Kompania “LA PETROLIFERA ITALO ALBANESE” ofroi 5.297.200 euro.
“`