KPP i hap rrugë tenderit prej 2.1 milionë eurosh për sistemin e Thesarit pas muajsh ankimimesh
Komisioni i Prokurimit Publik (KPP) ka rrëzuar ankesën e fundit të një operatori ekonomik, duke i dhënë dritën jeshile Agjencisë Kombëtare të Shoqërisë së Informacionit (AKSHI) për të vijuar procedurën e tenderit me fond limit 207.7 milionë lekë pa TVSH, që përkthehet në mbi 2.1 milionë euro. Tenderi synon mirëmbajtjen e sistemit të Thesarit dhe blerjen e licencave Oracle për Ministrinë e Financave.
Vendimi numër 1066/2026, i marrë më 27 gusht, i jep fund një periudhe të gjatë ankimesh dhe ndryshimesh të dokumenteve të tenderit, që kishte filluar që në tetor të vitit të kaluar. Procedura ishte publikuar më 22 tetor 2025, ndërsa shoqëria “Data Log” paraqiti ankesën e parë në fund të atij muaji, duke kërkuar modifikimin e dokumenteve.
Në shkurt 2026, KPP e pranoi pjesërisht ankesën dhe urdhëroi AKSHI-n të bënte ndryshime në dokumentacion. Megjithatë, pas publikimit të ndryshimeve në mars, Komisioni konstatoi se vendimi nuk ishte zbatuar plotësisht dhe më 30 mars bllokoi vijimin e procedurës. Mosmarrëveshja vazhdoi gjatë pranverës.
Më 11 maj 2026, KPP vendosi për herë të dytë të mos lejonte vijimin e tenderit, duke kërkuar sërish modifikimin e dokumenteve. Katër ditë më vonë, pas një tjetër ankese nga “Data Log”, Komisioni e pranoi atë pjesërisht dhe kërkoi ndryshime shtesë në termat e referencës.
AKSHI publikoi më 18 qershor një shtojcë të dytë me ndryshimet dhe sqarimet e kërkuara. Gjashtë ditë më vonë, “Data Log” paraqiti një tjetër ankesë, duke kundërshtuar disa kritere dhe specifikime teknike. Në korrik, Komisioni i Shqyrtimit të Ankesave pranë AKSHI-t pranoi një pjesë të pretendimeve, duke përfshirë korrigjimin e një reference të gabuar ndaj një vendimi të KPP-së, heqjen e kriterit për CSP dhe Oficerin e Sigurimit Industrial, si dhe disa kërkesa për sqarime teknike. Këto pika u mbyllën pasi u pranuan nga autoriteti kontraktor.
Për pretendimet e mbetura, KPP arriti në përfundimin se AKSHI kishte zbatuar vendimet e mëparshme dhe kishte ofruar sqarimet e nevojshme në termat e referencës. Komisioni konstatoi se shtojca e publikuar më 18 qershor përmbante përcaktimet e vendimeve të mëparshme dhe se paqartësitë e ngritura nga ankimuesi ishin adresuar.
Në vendimin përfundimtar të 27 gushtit, KPP vendosi të mos pranojë ankesën e “Data Log” dhe të lejojë AKSHI-n të vijojë me hapat e mëtejshëm të procedurës së tenderimit.