“`html
Projektet energjetike rajonale marrin status të rëndësisë kombëtare, me leje deri në 42 muaj
Qeveria ka miratuar rregulla të reja për zhvillimin e projekteve të infrastrukturës energjetike rajonale dhe transevropiane. Këto projekte do të kenë një proces lejimi të kombinuar deri në 42 muaj dhe status prioritar, sidomos ato të përfshira në listën e Komunitetit të Energjisë.
Vendimi nr. 650, datë 27 gusht 2026, i publikuar në Fletoren Zyrtare, zbatohet për projekte me interes për Komunitetin e Energjisë (PECI) dhe projekte me interes të ndërsjellë (PMI) që lidhen me infrastrukturën energjetike ndërkufitare.
Procesi i dhënies së lejeve ndahet në dy faza kryesore:
- Procedura para-aplikimit: Parashikohet të zhvillohet brenda një periudhe indikative prej 24 muajsh.
- Procedura ligjore: Nga pranimi i dosjes deri te vendimi gjithëpërfshirës, nuk duhet të tejkalojë 18 muaj.
Vendimi thekson se “Kohëzgjatja e kombinuar e të dyja procedurave të mos tejkalojë 42 muaj”. Ky afat mund të zgjatet rast pas rasti deri në nëntë muaj, përveç rrethanave të jashtëzakonshme.
Ministria përgjegjëse për energjinë është caktuar si autoriteti kombëtar që lehtëson dhe bashkërendon procesin e lejeve. Edhe në rast delegimi të kompetencave, vetëm një autoritet do të mbetet përgjegjës për projektin dhe do të shërbejë si pikë e vetme kontakti për promotorin.
Projektet që përfshihen në listën e Komunitetit të Energjisë do të marrin statusin e çështjeve me rëndësi kombëtare për procedurat e planifikimit dhe zhvillimit të territorit. Kjo përfshin lejet e zhvillimit, ndërtimit dhe proceset e vlerësimit mjedisor. Edhe procedurat gjyqësore dhe ankimore që lidhen me këto projekte do të trajtohen si urgjente.
Vendimi kërkon të paktën një konsultim publik përpara dorëzimit të dosjes përfundimtare të aplikimit. Për projektet ndërkufitare që përfshijnë dy ose më shumë palë kontraktuese, konsultimet publike duhet të zhvillohen brenda jo më shumë se dy muajve nga nisja e konsultimit të parë.
Rregullat përcaktojnë gjithashtu kriteret për përfshirjen e projekteve në listën e Komunitetit të Energjisë. Këto përfshijnë kushtin që përfitimet e mundshme të projektit të tejkalojnë kostot dhe që projekti të përfshijë të paktën dy palë kontraktuese ose të ketë ndikim të konsiderueshëm ndërkufitar.
Lista e projekteve PECI dhe PMI përcaktohet çdo dy vjet. Projektet e përfshira në këtë listë duhet të bëhen pjesë e planeve rajonale të investimeve dhe planeve kombëtare dhjetëvjeçare të zhvillimit të rrjetit, duke marrë “prioritetin më të lartë të mundshëm” në këto plane.
Vendimi parashikon gjithashtu kushtet që projektet të mund të kualifikohen për ndihmë teknike dhe financiare nga Bashkimi Evropian, përmes Instrumentit të Paraanëtarësimit (IPA) dhe Instrumentit të Fqinjësisë, Zhvillimit dhe Bashkëpunimit Ndërkombëtar (NDICI).
Rregullorja e miratuar është përafruar plotësisht me rregulloren e BE-së 2022/869 për infrastrukturën energjetike transevropiane.
“`