“`html
KPP kthen për rivlerësim tenderin prej 2.6 milionë euro për shërbimin e lavanderisë së Spitalit “Shefqet Ndroqi”.
Komisioni i Prokurimit Publik (KPP) ka kthyer për rivlerësim një tender me fond limit rreth 2.64 milionë euro pa TVSH, i cili synon të mbulojë shërbimin e lavanderisë dhe hotelerisë për pacientët e shtruar në Qendrën Spitalore Rajonale “Shefqet Ndroqi”. Ky veprim vjen pas urdhrit për të kualifikuar një nga operatorët që kishte paraqitur ankesë.
Me vendimin nr. 1090/2026, datë 1 shtator, KPP miratoi ankesën e kompanisë “Abi’s”, por hodhi poshtë atë të kompanisë italiane “Hospital Service SRL”. KPP i ka kërkuar autoritetit kontraktor, Operatori i Blerjeve të Përqendruara, të kryejë një rivlerësim të procedurës në përputhje me konstatimet e Komisionit.
Procedura ka një fond limit prej 251.26 milionë lekësh pa TVSH, ekuivalente me rreth 2.64 milionë euro, bazuar në kursin zyrtar të këmbimit prej 95.18 lekësh për euro në datën 9 qershor. Tenderi u publikua më 10 qershor, ndërsa faza e parë, ajo e shprehjes së interesit, u zhvillua më 17 korrik.
Në vlerësimin fillestar, Komisioni i Vlerësimit të Ofertave kishte skualifikuar si “Abi’s” ashtu edhe “Hospital Service”. Rezultatet iu komunikuan operatorëve më 22 korrik, dhe pesë ditë më vonë, më 27 korrik, autoriteti kontraktor njoftoi anulimin e procedurës.
“Abi’s” paraqiti ankesën në KPP më 30 korrik, ndërsa “Hospital Service” e bëri këtë një ditë më vonë. Operatori i Blerjeve të Përqendruara i kishte rrëzuar të dyja ankesat me vendime të datës 7 gusht.
Skualifikimi i “Abi’s” lidhej me një kriter teknik që kërkonte një certifikatë specifike për sistemin e kontrollit të biokontaminimit, ose një certifikatë ekuivalente. Kompania kishte paraqitur një certifikatë të tillë me vlefshmëri deri më 17 gusht 2028. Komisioni i Vlerësimit të Ofertave e kishte skualifikuar “Abi’s” pas verifikimeve në Drejtorinë e Përgjithshme të Akreditimit.
Megjithatë, KPP arriti në një përfundim tjetër. Sipas Komisionit, dokumentet e tenderit nuk specifikonin që certifikata e kërkuar duhej të ishte lëshuar nga një organ i akredituar posaçërisht për këtë standard. Kriteri kërkonte që certifikata të përfshinte objektin e prokurimit, të ishte e vlefshme dhe të përputhej me standardin ose të ishte ekuivalente.
Në vendim, KPP thekson se arsyeja e skualifikimit të “Abi’s” u bazua në një kërkesë që nuk ishte parashikuar në kriteret e tenderit dhe se vlerësimi i operatorëve duhet të kryhet vetëm në bazë të kërkesave të përcaktuara në dokumentet e procedurës. Për pasojë, Komisioni vlerësoi se “Abi’s” përmbushte kriterin teknik në fjalë.
Për “Hospital Service”, KPP mori një qëndrim të kundërt. Kompania italiane kishte ngarkuar në sistem një certifikatë UNI EN 14065:2016, e cila kishte skaduar më 14 shkurt 2026, rreth pesë muaj para zhvillimit të fazës së parë të procedurës më 17 korrik. “Hospital Service” argumentoi se kishte ngarkuar gabimisht versionin e vjetër të certifikatës dhe se dispononte një certifikatë pasardhëse, të lëshuar më 9 shkurt 2026 dhe të vlefshme deri më 13 shkurt 2029.
KPP megjithatë, vlerësoi se operatori ekonomik kishte përgjegjësinë të paraqiste në Sistemin e Prokurimeve Elektronike (SPE) dokumentacionin që provonte përmbushjen e kritereve dhe se vlerësimi duhet të mbështetej në dokumentet e dorëzuara. Komisioni shtoi gjithashtu se autoriteti kontraktor nuk duhet të mbështetet te verifikimet online në vend të dokumentacionit të paraqitur në SPE.
“`