“`html
Tragjedi në Nigeri: Të paktën 37 persona humbin jetën gjatë tentativës për vjedhje nafte
Një tragjedi ka ndodhur në jug të Nigerisë, ku të paktën 37 persona dyshohet se kanë humbur jetën si pasojë e thithjes së gazeve toksikë gjatë përpjekjes për të vjedhur produkte nafte nga një tubacion. Shumë të tjerë rezultojnë të zhdukur, ndërsa raportohet se trupa janë parë duke lundruar në lumë.
Bilanci i rëndë është bërë publik nga Qendra e Veprimit për të Rinjtë dhe Mjedisin (YEAC-Nigeria), një organizatë joqeveritare lokale. Policia ka konfirmuar incidentin, por ende nuk ka dhënë shifrat zyrtare të viktimave.
“Të paktën 37 persona kanë vdekur pasi kanë thithur gazra nga produktet e kompanisë petrokimike Indorama dhe shumë të tjerë rezultojnë të zhdukur”, njoftoi YEAC-Nigeria.
Ngjarja e rëndë ka ndodhur në Okrika, pranë Port Harcourt, kryeqytetit të shtetit Rivers. Sipas të dhënave të organizatës, disa të rinj kishin ndërhyrë në një tubacion që transportonte produkte nafte nga uzina Indorama Eleme Petrochemical drejt anijeve për eksport. Ata dyshohet se kishin lidhur një tub me linjën e transportit të karburantit për ta vjedhur atë.
Gjatë ndërhyrjes, personat e pranishëm dyshohet se u ekspozuan ndaj një përqendrimi të lartë gazeve toksikë, me pasoja fatale.
Përmasat e tragjedisë mund të jenë edhe më të mëdha, pasi kërkimet për personat e zhdukur vijojnë. “Shumë njerëz janë të zhdukur dhe trupa janë parë duke lundruar në lumë, por ende nuk janë gjetur”, deklaroi YEAC-Nigeria.
Policia e shtetit Rivers ka konfirmuar se një incident i rëndë ka ndodhur në Okrika dhe se autoritetet po merren me rastin, por deri tani nuk ka konfirmuar zyrtarisht bilancin prej 37 viktimash të raportuar nga organizata joqeveritare.
Vjedhja e naftës dhe ndërhyrjet e paligjshme në tubacione janë një problem i vazhdueshëm në Deltën e Nigerit, një prej rajoneve kryesore naftëmbajtëse të vendit. Përveç rrezikut të madh për jetën, dëmtimi dhe sabotimi i tubacioneve konsiderohen ndër burimet kryesore të ndotjes së rëndë të mjedisit në zonë.
“`