Trump në Irlandë, masa të paprecedenta sigurie: Qindra policë në terren, protestat e presin në Dublin dhe Doonbeg
Presidenti i Shteteve të Bashkuara të Amerikës, Donald Trump, ka mbërritur mëngjesin e së shtunës në Aeroportin e Dublinit, duke filluar kështu vizitën e tij zyrtare dyditore në Irlandë. Për të siguruar vizitën e kreut të Shtëpisë së Bardhë, autoritetet irlandeze kanë aktivizuar një operacion të gjerë sigurie, me angazhimin e qindra efektivëve në terren.
Avioni presidencial u ul rreth orës 08:25 me orën lokale. Trump u prit në aeroport nga zëvendëskryeministri irlandez, Simon Harris. Gjatë qëndrimit në Dublin, Presidenti amerikan do të zhvillojë një sërë takimesh të nivelit të lartë.
Trump pritet të vizitojë Presidenten e Irlandës, Catherine Connolly, në rezidencën zyrtare Áras an Uachtaráin. Më pas, do të zhvillojë bisedime me kryeministrin irlandez, Micheál Martin, në Farmleigh House. Një pjesë e axhendës së tij përfshin edhe një fjalim para qindra të ftuarve në rezidencën e Ambasadorit të SHBA-së në Irlandë, Edward Walsh.
Pas takimeve në kryeqytet, Trump do të udhëtojë drejt Aeroportit Shannon, në qarkun Clare, për të vijuar vizitën në Doonbeg, ku ndodhet resorti i tij luksoz i golfit. Në këtë zonë po zhvillohet aktualisht turneu i njohur Irish Open.
Trump pritet të ndjekë ndeshjet dhe, sipas raportimeve, të dorëzojë trofeun për fituesin e turneut të dielën, para se të kthehet në SHBA. Vizita ka sjellë masa të forta sigurie në të gjithë itinerarin e Presidentit amerikan.
Policia irlandeze, An Garda Síochána, ka angazhuar qindra efektivë shtesë dhe ka kufizuar lejet për një pjesë të forcave të saj. Kufizime të qarkullimit janë vendosur në zona të ndryshme të Dublinit dhe Clare. Autoritetet po përgatiten gjithashtu për protesta kundër vizitës së Trump, me tubime që pritet të zhvillohen si në Dublin, ashtu edhe pranë resortit në Doonbeg.