Zgjedhjet në Suedi: Një garë e ngushtë, e djathta ekstreme synon për herë të parë hyrjen në qeveri
Qytetarët suedezë po votojnë sot për të zgjedhur parlamentin e ri, në një përballje politike tejet të ngushtë që mund të shënojë një kthesë historike për vendin.
Kryeministri aktual konservator, Ulf Kristersson, kërkon një mandat të dytë përballë lideres së Social Demokratëve dhe ish-kryeministres Magdalena Andersson. Sondazhet tregojnë një garë pothuajse të barabartë mes dy blloqeve rivale.
Në qendër të vëmendjes është roli i partisë së djathtë ekstreme, Demokratët e Suedisë. Ndërsa qeveria aktuale përbëhet nga Partia e Moderuar, Demokristianët dhe Liberalët, ajo është mbështetur në parlament nga kjo forcë politike.
Kristersson ka deklaruar se në rast fitoreje mund të shkojë një hap më tej, duke i përfshirë zyrtarisht ata në kabinet. Ky zhvillim do t’u jepte për herë të parë akses të drejtpërdrejtë në pushtet.
Nga 10.6 milionë banorë të vendit, rreth 8 milionë suedezë kanë të drejtë vote. Pjesëmarrja pritet të jetë mjaft e lartë, pasi më shumë se gjysma e votuesve e kanë ushtruar tashmë të drejtën e tyre përmes votimit paraprak.
Qendrat e votimit do të jenë të hapura nga ora 08:00 deri në 20:00 sipas kohës lokale, pas së cilës pritet të dalin edhe rezultatet e para të numërimit.