Qindra emigrantë të dëbuar nga Britania zhduken në Francë, Parisi kërkon anulimin e marrëveshjes dypalëshe
Qindra emigrantë të paligjshëm, të kthyer nga Mbretëria e Bashkuar në Francë në kuadër të një marrëveshjeje dypalëshe, janë zhdukur pa lënë gjurmë, raporton The Guardian duke cituar organizata për të drejtat e njeriut. Mes personave të zhdukur përfshihen edhe mbi 40 individë me moshë të kontestuar, të cilët pretendonin se ishin fëmijë të mitur të pashoqëruar.
Pakti, i ndërmjetësuar verën e kaluar mes Londrës dhe Parisit, u promovua si një arritje e madhe. Ai i jepte mundësi Britanisë të kthente kërkuesit e paligjshëm të azilit që kalonin Kanalin e Manshit, ndërsa pranonte azilkërkues me kërkesa legjitime që nuk kishin tentuar hyrjen ilegale.
Megjithatë, rezultatet e kësaj skeme konsiderohen mjaft të kufizuara. Që nga nënshkrimi në shtator të vitit të kaluar, janë kthyer vetëm rreth 1,400 emigrantë, ndërsa në tokën britanike kanë mbërritur mbi 32,000 persona ilegalisht.
Sipas Maddie Harris, drejtoreshë e organizatës “Humans for Rights Network”, mes të kthyerve që tashmë janë zhdukur ishin të paktën 41 persona me moshë të kontestuar. Ajo rikujtoi se mbajtja e të miturve të pashoqëruar në qendrat e paraburgimit për të rritur është e paligjshme dhe ata janë kategorikisht të përjashtuar nga kjo marrëveshje.
Nga ana tjetër, Ministria e Brendshme britanike i ka hedhur poshtë me forcë këto akuza, duke këmbëngulur se të gjithë të dëbuarit ishin të rritur dhe se askush me moshë të diskutueshme nuk është kthyer në Francë.
Me skadimin e marrëveshjes që afrohet në tetor, e ardhmja e saj duket e zymtë. Ministri i Brendshëm francez, Laurent Nunez, i ka bërë të ditur homologes së tij britanike, Shabana Mahmood, se Parisi nuk do ta zgjasë paktin dypalësh. Franca kërkon të largohet nga ky kuadër dhe po nxit krijimin e një marrëveshjeje më të gjerë mes Mbretërisë së Bashkuar dhe gjithë Bashkimit Evropian. Në kuadër të saj, Londra do të duhej të pranonte emigrantë nga të 27 shtetet anëtare në këmbim të atyre që kthen mbrapsht.