“Gjëra të rëndësishme po vijnë” / Paralajmërimi i Trump për Iranin: Bëjnë mirë të sillen mirë, ose do të përballen me pasoja të rënda
Presidenti amerikan Donald Trump ka deklaruar se ndodhet në një “fazë vendimmarrjeje” lidhur me marrëdhëniet mes Shteteve të Bashkuara dhe Iranit, duke paralajmëruar se “gjëra shumë të rëndësishme” mund të ndodhin në të ardhmen e afërt.
Deklaratat e tij u bënë gjatë një komunikimi me një korrespondent të Fox News për çështjet e jashtme. Trump la të hapura disa mundësi për hapat e ardhshëm të administratës amerikane, ndërsa në deklaratat e tij përdori edhe një paralajmërim të ashpër drejtuar Iranit.
Sipas raportimeve, ai u shpreh se nëse Irani nuk sillet siç duhet, Shtetet e Bashkuara mund të ndërmarrin veprime drastike. Ai shtoi se kjo do të lidhet me mënyrën se si do të veprojë Teherani.
Në të njëjtën kohë, presidenti amerikan tha se është i hapur për një takim me presidentin iranian, duke shtuar se Teherani i ka përcjellë Uashingtonit një listë kërkesash për përfundimin e tensioneve.
Fox News raportoi se Irani i ka komunikuar kushtet përmes Katarit dhe se administrata amerikane po i shqyrton ato. Mundësia e një takimi vjen përpara Asamblesë së Përgjithshme të Kombeve të Bashkuara në Nju Jork, ku pritet të jenë të pranishëm edhe Trump dhe presidenti iranian.
Shtetet e Bashkuara kanë miratuar vizat për presidentin iranian dhe zyrtarë të tjerë të lartë të Teherit për pjesëmarrjen në aktivitetet e OKB-së.
Ndërkohë, tensionet mes Uashingtonit dhe Teheranit mbeten të larta. Irani ka paralajmëruar Shtetet e Bashkuara dhe aleatët e saj kundër nisjes së sulmeve të reja, ndërsa autoritetet iraniane kanë deklaruar se do të kundërpërgjigjen ndaj çdo sulmi të ri.