Kallas ashpërson tonet pas zgjedhjeve në Rusi: Një tjetër goditje e madhe për demokracinë
Zgjedhjet për Dumën e Shtetit në Rusi kanë shkaktuar reagime të forta nga Bashkimi Evropian. Shefja e diplomacisë së BE-së, Kaja Kallas, i ka cilësuar ato si një tjetër goditje të rëndë për demokracinë në vend.
Zgjedhjet u zhvilluan më 18-20 shtator, ndërsa BE-ja ka shprehur shqetësim për kufizimin e opozitës dhe mungesën e vëzhguesve ndërkombëtarë.
“Zgjedhjet e ashtuquajtura të Dumës shënuan një tjetër goditje të madhe për demokracinë ruse. Rezultati i tyre nuk u vu kurrë në dyshim”, shkroi Kallas në rrjetet sociale. Sipas saj, autoritetet ruse kanë shtypur mospajtimin dhe kanë kufizuar hapësirën për opozitën politike.
BE-ja ka theksuar veçanërisht përjashtimin e kandidatëve të partisë Yabloko, të cilën e përshkruan si një nga forcat e fundit opozitare dhe të vetmen me platformë kundër luftës në Ukrainë.
Një tjetër çështje e ngritur nga Brukseli është mungesa e vëzhgimit të OSBE-së. Rusia nuk e ftoi misionin e OSBE/ODIHR për të monitoruar zgjedhjet, duke pamundësuar një vlerësim të pavarur dhe ndërkombëtar të procesit zgjedhor.
Kallas tha se do të propozojë masa ndaj personave që kanë lehtësuar zhvillimin e këtyre zgjedhjeve në territoret ukrainase të pushtuara nga Rusia.
BE-ja ka deklaruar se nuk i njeh zgjedhjet e zhvilluara në Krime, Sevastopol dhe në pjesë të rajoneve Donetsk, Luhansk, Zaporizhzhia dhe Kherson, duke i cilësuar ato si në kundërshtim me të drejtën ndërkombëtare.
Ndërkohë, sipas rezultateve paraprake, partia në pushtet, Rusia e Bashkuar, ka siguruar shumicën në Dumën e Shtetit. Me më shumë se 95% të votave të numëruara, ajo kishte marrë 57.83% të votave dhe 355 nga 450 mandatet, sipas Komisionit Qendror të Zgjedhjeve të Rusisë.
BE-ja ka deklaruar se do të vijojë mbështetjen për shoqërinë civile ruse, mbrojtësit e të drejtave të njeriut dhe mediat e pavarura, ndërsa ka paralajmëruar sanksione ndaj personave të përfshirë në organizimin e zgjedhjeve në territoret ukrainase të pushtuara.