Shqipëri–Greqi: Hapa konkretë për forcimin e bashkëpunimit doganor
Drejtori i Përgjithshëm i Doganave të Shqipërisë, z. Besmir Beja, priti në Tiranë homologun e tij grek, Drejtorin e Përgjithshëm të Doganave të Greqisë, z. Dimitrios Bourikos. Vizita u zhvillua në kuadër të Takimit të 14-të Bilateral të Nivelit të Lartë mes dy administratave doganore.
Fokusi kryesor i takimit ishte forcimi i bashkëpunimit në disa drejtime kyçe:
- Menaxhimi i përbashkët i kufirit.
- Lehtësimi i tregtisë dhe lëvizjes së personave dhe mallrave.
- Implementimi i projekteve si Green Lanes dhe SEED+.
- Shkëmbimi elektronik i të dhënave.
- Digjitalizimi i proceseve doganore.
- Forcimi i luftës kundër kontrabandës dhe trafiqeve të paligjshme.
Një zhvillim konkret dhe domethënës është avancimi i shkëmbimit elektronik të të dhënave në pikën kufitare të Kakavijës. Pala shqiptare ka përfunduar fazën e zbatimit, duke mundësuar tashmë transmetimin e të dhënave drejt palës greke. Synimi është që ky bashkëpunim të shtrihet progresivisht edhe në pikat e tjera kufitare, me qëllim arritjen e analizave më të mira të riskut, procedurave më të shpejta dhe kontrolleve më efikase.
Gjatë bisedimeve u diskutua gjithashtu për:
- Monitorimin e flukseve dhe orareve në pikat e përbashkëta kufitare.
- Forcimin e bashkëpunimit mes strukturave doganore në të dy anët e kufirit.
- Zhvillimin e mëtejshëm të bashkëpunimit mes Sarandës dhe Korfuzit.
Në kontekstin e procesit të integrimit europian të Shqipërisë, dy administratat doganore shkëmbyen eksperienca lidhur me:
- Sistemet digjitale doganore të Bashkimit Europian.
- Ndërveprueshmërinë e sistemeve.
- Menaxhimin e riskut.
Palët ranë dakord për vijimin e bashkëpunimit teknik, organizimin e trajnimeve dhe shkëmbimin e ekspertizës.
Takimi u finalizua me marrëveshjen për hapa të mëtejshëm drejt funksionalizimit të plotë të sistemit Green Lanes, përmirësimit të shkëmbimit elektronik të të dhënave dhe forcimit të bashkëpunimit operacional mes Doganës Shqiptare dhe asaj Greke.