Fitore e madhe për Kombëtaren shqiptare kundër Serbisë ka shkaktuar një valë festimesh në të gjithë vendin. Tifozët kuqezi kanë mbushur rrugët e Tiranës, Durrësit, Shkodrës, Elbasanit, Prishtinës dhe qyteteve të tjera ku jetojnë shqiptarë, duke krijuar një atmosferë të jashtëzakonshme entuziazmi dhe krenarie.
Në kryeqytet, mijëra qytetarë të mbledhur për të ndjekur ndeshjen në ekranin gjigant shpërthyen në brohoritje, këngë patriotike dhe valle popullore menjëherë pas vulosjes së triumfit shqiptar në tokën serbe.
Pamje të ngjashme janë parë edhe në qytete të tjera, ku makina të stolisura me flamuj kombëtarë, fishekzjarrë dhe thirrje për “Shqipërinë” e kthyen natën në një festë që do të mbahet mend për gjatë.