Protesta të dhunshme kundër Presidentit Andry Rajoelina kanë përfshirë Madagaskarin për disa ditë, duke çuar në rrëzimin e qeverisë. Tensionet janë rritur ndjeshëm në kryeqytetin Antananarivo.
Një pjesë e ushtrisë ka hyrë në qytet për të treguar mbështetje për opozitën, duke u pozicionuar në Sheshin e 13 Majit, ku janë pritur me brohoritje nga turmat. Raportohet se Presidenti Rajoelina është larguar nga qyteti.
Një turmë u mblodh para selisë së forcave speciale elitare Capsat. Më herët, një mesazh në Facebook i kishte ftuar forcat e rendit të refuzonin urdhrin për të qëlluar drejt turmës.
Protestat filluan me kërkesa për shërbime më të mira uji dhe energjie, si dhe kundër korrupsionit dhe gjendjes së sistemit shëndetësor. Më pas, kërkesat u shtuan për dorëheqjen e Presidentit Rajoelina.
Megjithëse Rajoelina njoftoi shkarkimin e qeverisë dhe zëvendësimin e Kryeministrit më 6 tetor, protestat nuk u ndalën. Mijëra protestues u rikthyen në rrugë më 9 tetor.
Komisioneri i Lartë i OKB-së për të Drejtat e Njeriut, Volker Turk, i ka kërkuar autoriteteve të Madagaskarit të ndalojnë përdorimin e forcës së tepërt, ndërsa vazhdojnë raportimet për lëndime.