Hetimi për Belinda Ballukun: Altin Dumani e nxit Dritan Prençin të hetojë
Altin Dumani, kreu i SPAK-ut, ka folur në Kuvend lidhur me hetimin ndaj zv.kryeministres Belinda Balluku dhe pretendimet për presione ndaj prokurorit të çështjes, Dritan Prençi.
Dumani deklaroi se është në komunikim të vazhdueshëm me prokurorin Prençi rreth kësaj çështjeje, por sipas tij, prokurori nuk i ka raportuar asnjë kërcënim.
“Prokurori Prençi dhe të gjithë prokurorët kanë përkrahjen time,” tha Dumani. “Jam në komunikim të përhershëm me prokurorin dhe deri tani nuk më ka paraqitur asnjë kërcënim. Ai ka pasur dhe ka gjithë solidaritetin tim në çdo çështje që ka në ndjekje, jo vetëm ai, por të gjithë prokurorët e SPAK-ut.”
Ai shtoi se, si drejtues i Prokurorisë së Posaçme, nuk ka qenë kurrë pengesë për hetimet, por përkundrazi, është përpjekur të krijojë një ambient të lirë për prokurorët që të ushtrojnë ndjekjen penale.
“Si drejtues i Prokurorisë së Posaçme, asnjëherë nuk kam qenë bllokues i hetimeve. Përkundrazi, jam përpjekur që prokurorët të kenë një ambient të lirë për të ushtruar ndjekjen penale. I kam mbështetur dhe do t’i mbështes,” u shpreh Dumani.
Mediat raportuan më parë se Belinda Balluku mori një fletë-thirrje për t’u paraqitur në Prokurorinë e Posaçme, lidhur me hetimin për shkelje të barazisë në tendera. Kjo çështje dyshohet se lidhet me disa biseda të zbuluara në telefonin e ish-vartësit të saj, Ervis Berberi.
Megjithatë, zv.kryeministrja u paraqit në Rumani këtë të hënë për një takim me ministrat e energjisë të disa vendeve të BE. Për këtë arsye, pritet t’i dërgohet një fletë-thirrje e dytë.