“`html
Shërbimet online, por administrata publike arrin në 185.4 mijë punonjës, rekordi i 23 viteve
Në tremujorin e fundit të vitit të kaluar, numri i punonjësve në sektorin shtetëror u zgjerua më tej, duke arritur në 186,581 persona. Numri mesatar i punonjësve për të gjithë vitin 2025 ishte 185,386.
Sipas të dhënave zyrtare të INSTAT, në krahasim me vitin 2024, administrata publike u zgjerua me rreth 3,000 punonjës, ose me 1.6% më shumë. Ky nivel është më i larti që nga viti 2002.
Në vitin 2002, Shqipëria numëronte mbi 3 milionë banorë dhe shërbehej nga rreth 186,000 punonjës publikë. Njëzet e tre vite më pas, popullsia ka pësuar një rënie prej 22%, duke zbritur në rreth 2.36 milionë banorë. Kjo tkurrje reflekton emigrimin dhe rënien e lindshmërisë.
Megjithatë, në vend që të ndiqte këtë trend rënës apo të reflektonte automatizimin e shërbimeve përmes investimeve të mëdha në platforma dixhitale, numri i punonjësve në administratë ka shënuar rritje të shpejtë, sidomos pas vitit 2018.
Në vitin 2014, fondet për paga dhe kontribute për punonjësit e shtetit ishin rreth 71.4 miliardë lekë, ndërsa numri i të punësuarve në sektorin publik ishte rreth 163,000 persona. Njëmbëdhjetë vite më vonë, në vitin 2025, administrata publike numëron rreth mbi 185,000 punonjës dhe shpenzimet buxhetore për personelin janë rritur në rreth 125.7 miliardë lekë.
Nga viti 2024 në 2025, numri i punonjësve në sektorin shtetëror është zgjeruar me 12.7 për qind, ndërsa shpenzimet ndaj tyre janë rritur me 76 për qind.
Rritja nuk ka qenë vetëm në numrin e punonjësve dhe fondet për paga. Paralelisht, investimet për qeverisjen digjitale janë shtuar me ritme të shpejta në 6 vitet e fundit. Në vitin 2025, financimi për e-qeverisjen u rrit me tre herë brenda vitit, duke arritur në 20.1 miliardë lekë (mbi 200 milionë euro), nga rreth 3.3 miliardë lekë që jepeshin në vitin 2019. Në total, brenda 4 vjetësh, janë investuar 48.4 miliardë lekë, ose gati 500 milionë euro.
Qeveria e ka paraqitur digjitalizimin si një nga shtyllat kryesore të modernizimit të administratës dhe përmirësimit të shërbimeve për qytetarët dhe bizneset.
Të dhënat e Eurostat tregojnë se shqiptarët e përdorin e-qeverisjen më shumë se mesatarja e Bashkimit Europian, pasi shumë shërbime tashmë mund të merren vetëm online. 78% e qytetarëve shqiptarë ndërvepruan me autoritetet publike në mënyrë online gjatë 12 muajve të mëparshëm, krahasuar me 72% mesatare në Bashkimin Europian.
Megjithë këto investime, shërbimet publike digjitale kanë shfaqur probleme serioze funksionimi gjatë muajve të fundit. Platforma kryesore e-Albania është përballur me ndërprerje të shpeshta, vonesa dhe pamundësi aksesimi, duke krijuar vështirësi reale në marrjen e dokumenteve dhe kryerjen e procedurave administrative.
Kalimi i shërbimeve online pritej të sillte një administratë më të vogël, por shifrat tregojnë se për çdo qytetar që largohet nga vendi, barra e administratës mbi ata që mbeten bëhet gjithnjë e më e rëndë.
Në vitin 2003, kishte rreth 16 banorë për çdo punonjës shteti. Në vitin 2025, ky raport pritet të ngushtohet në më pak se 13 banorë për një punonjës, duke e kthyer sektorin publik në një strukturë të fryrë që nuk i përgjigjet realitetit të ri demografik, as modernizimit të paguar shtrenjtë nga taksapaguesit.
“`