“`html
Tatimet kërkojnë nga bizneset dorëzimin e inventarëve deri më 31 janar
Administrata Tatimore i ka njoftuar bizneset për detyrimin e dorëzimit të inventarëve deri në fund të janarit.
Referuar Ligjit nr. 9920, datë 19.05.2008, “Për Procedurat Tatimore në Republikën e Shqipërisë”, i ndryshuar, nenit 60 “Detyrimi i tatimpaguesve për të dhënë informacion administratës tatimore”, subjektet tatimore duhet të depozitojnë inventarin analitik të datës 31.12.2025.
Inventari duhet të përfshijë detaje mbi lëndën e parë, produktet e gatshme dhe mallrat për rishitje, duke specifikuar njësitë, sasitë, çmimet dhe vlerën. Ky informacion duhet të ngarkohet në mënyrë elektronike në sistemin e tatimeve e-Filing, në seksionin “Çështjet e mia”, brenda datës 31.01.2026, me emrin “Inventari 31.12.2025”.
Njoftimi thekson se, bazuar në analizën e riskut dhe duke marrë parasysh indikatorë si mosdorëzimi në afat, pasaktësia ose mospërputhja me të dhënat nga fiskalizimi, tatimpaguesi mund të konsiderohet me risk dhe t’i nënshtrohet verifikimit në vend për saktësinë e inventarit.
Disa biznese kanë shprehur shqetësimin se ky afat është tepër i ngushtë, veçanërisht pas problemeve të hasura me platformën “self-care”, e cila ka qenë jashtë funksioni për tre javë, duke penguar rakordimin e faturave.
Megjithatë, ka edhe mendime se mosfunksionimi i “self-care” nuk përbën pengesë për përgatitjen e inventarëve, pasi informacioni mund të nxirret nga sistemi e-Filing.
Mosfunksionimi i platformës “self-care” ka prekur bizneset edhe në përgatitjen e pasqyrave financiare për vitin 2025. Kontabilisti Sotiraq Dhamo ka deklaruar më parë se “Self Care” është baza kryesore për rakordimet dhe se është e nevojshme qasja në platformë për kryerjen e disa rakordimeve të nevojshme për përgatitjen e Planit Financiar vjetor 2025.
Shoqata e Kontabilistëve dhe Financierëve të Shqipërisë ka kërkuar një plan emergjence dhe shtyrje të afateve për dorëzimin e bilanceve, afat i cili është 31 marsi. Sipas shoqatës, përgatitja e tyre kërkon kohë dhe puna fillon që në janar. Ata theksojnë se rakordimi i shitjeve dhe blerjeve midis asaj që raporton softueri i biznesit dhe asaj që përpunohet nga serveri tatimor është kthyer në një sfidë. Pa këtë pasqyrë të qartë, hartimi i Pasqyrave Financiare bëhet i vështirë dhe mund të cënojë parimin e vërtetësisë.
“`