Kentaki Shpall Gjendje të Jashtëzakonshme pas Rrëzimit të një Avioni Mallrash
Guvernatori i Kentakit, Andy Beshear, ka shpallur gjendje të jashtëzakonshme në këtë shtet amerikan, pas rrëzimit të një avioni mallrash të kompanisë UPS pak pasi u ngrit nga aeroporti i Luisvilit. Aksidenti ka shkaktuar vdekjen e të paktën nëntë personave.
Pak pas nisjes nga aeroporti, avioni u përfshi nga flakët dhe më pas u rrëzua. Për pasojë, u shkatërruan dy biznese pranë aeroportit dhe u shkaktuan vonesa në operacionet e kompanisë së transportimit të mallrave.
Guvernatori Beshear u tha gazetarëve se pret që numri i viktimave të rritet. Avioni u rrëzua pranë një zone industriale, duke goditur edhe një kompani të naftës. Ai shtoi se shpallja e gjendjes së jashtëzakonshme do të ndihmojë në reagimin e shtetit ndaj këtij aksidenti, duke lejuar dërgimin më të shpejtë të burimeve në vendngjarje.
Avioni i mallrave, një MD-11 i prodhuar 34 vite më parë, u përfshi nga flakët. Hetuesit nga Bordi Kombëtar Amerikan për Sigurinë e Transportit pritet të japin detaje mbi shkaqet e aksidentit.
Sipas kompanisë UPS, në avion ishin tre anëtarë të ekuipazhit, të cilët, sipas zyrtarëve amerikanë, nuk i mbijetuan aksidentit. Rreth 200 zjarrfikës dhe personel emergjence, si dhe 50 kamionë, u angazhuan për të shuar flakët.
Guvernatori Beshear sqaroi se një qendër konventash, një restorant dhe një fabrikë e Ford Motor Co. pranë vendit të ngjarjes nuk janë prekur nga zjarri.
Zyrtarët raportuan se 11 persona u dërguan në spitale të martën, ndërsa një zyrtar i tha agjencisë Reuters se të paktën 10 persona të tjerë konsiderohen të zhdukur. Dy persona janë në gjendje kritike.
Aeroporti Ndërkombëtar i Luisvilit u rihap për trafik ajror të mërkurën, por pista ku ndodhi aksidenti pritet të mbetet e mbyllur për rreth 10 ditë.
UPS njoftoi se ka pezulluar disa operacione pas kësaj ngjarjeje. Prodhimi i avionëve MD-11 u ndal në vitin 2000 dhe shërbimi për pasagjerë përfundoi zyrtarisht në vitin 2014. Aktualisht, rreth 50 avionë MD-11 përdoren për transport mallrash nga FedEx dhe UPS në mbarë botën.
GE Aerospace, prodhuesi i motorëve të avionit, ka ofruar mbështetjen e saj për UPS dhe autoritetet amerikane.
Avioni me tre motorë ishte i ngarkuar me karburant për një fluturim të planifikuar tetë orë e gjysmë drejt Honolulu-s.
Ky ishte avioni i parë mallrash i UPS-it që është rrëzuar që nga gushti i vitit 2013, kur një avion Airbus u përplas gjatë përpjekjes për t’u ulur në Aeroportin Ndërkombëtar të Birminghamit, Alabama, duke lënë të vdekur të gjithë anëtarët e ekuipazhit.