Bolivi: Autobusi humb kontrollin dhe bie në humnerë, 16 viktima
Të paktën 16 persona humbën jetën dhe 36 të tjerë u plagosën kur një autobus me të cilin po udhëtonin u rrëzua nga një shkëmb rreth 300 metra i lartë në zonën qendrore të Bolivisë. Ngjarja e rëndë ndodhi të hënën në Morochata, departamenti i Cochabamba-s, në juglindje të kryeqytetit La Paz.
Drejtori i policisë së trafikut, Omar Segada, shpjegoi se “aksidenti ndodhi kur shoferi humbi kontrollin e automjetit, duke bërë që autobusi të bënte rënien nga shkëmbi”.
Sipas raportimeve të mediave boliviane, shoferi 23-vjeçar i autobusit ka mbijetuar. Ai është arrestuar dhe po merret në pyetje.
Statistikat tregojnë se rreth 1,400 njerëz humbin jetën çdo vit në aksidente trafiku në Bolivi, sipas të dhënave të Ministrisë së Brendshme. Një tjetër aksident tragjik ndodhi në mars, ku 37 persona vdiqën pas përplasjes së dy autobuseve në Potosi, në pjesën jugore të vendit.