Mëngjes tragjik në ditën e parë të vitit 2026, tre të rinj humbin jetën në një aksident në Tepelenë
Një aksident i rëndë rrugor ka ndodhur në aksin Gjirokastër – Tepelenë, në vendin e quajtur Bypass, duke marrë jetën e tre të rinjve në orët e para të vitit 2026. Ngjarja e rëndë ka kthyer mëngjesin e ditës së parë të vitit në një bilanc tragjik.
Përplasja ka ndodhur rreth orës 03:18. Sipas të dhënave paraprake, dy automjete, një Volkswagen dhe një Mercedes Benz, janë përplasur me forcë.
Në automjetin Volkswagen udhëtonin dy të rinj, 27 dhe 24 vjeç, të cilët humbën jetën në vend nga plagët e marra. Në automjetin Mercedes Benz udhëtonin dy të rinj të tjerë, 25 dhe 19 vjeç. Pasagjerja 19 vjeçe, nga Delvina, ka mbetur e plagosur rëndë dhe është transportuar drejt Spitalit të Traumës në Tiranë, ku ndodhet në gjendje kritike.
Viktimat janë identifikuar si:
- Martin Dulaj, 25 vjeç, nga Tepelena
- Klejdi Myftari, 24 vjeç, nga Tepelena
- Anxhelo Ruçi, 27 vjeç, nga Tepelena
E plagosura është Arsida Demiri, 19 vjeçe, nga Delvina.
Në vendngjarje kanë mbërritur menjëherë forcat e Policisë Rrugore, ambulancat dhe zjarrfikësja. Ndërhyrja ka qenë e shpejtë, por për tre të rinjtë nuk ka pasur mundësi shpëtimi.
Policia e Gjirokastrës konfirmoi me një njoftim se “rreth orës 03:18” automjeti me drejtues shtetasin M. D. u përplas me automjetin që drejtohej nga shtetasi K. M. Si pasojë, “kanë humbur jetën dy drejtuesit e automjeteve” dhe pasagjeri A. R., ndërsa “ka mbetur e dëmtuar” pasagjerja 19 vjeçe, e cila ndodhet në Spitalin e Traumës nën kujdesin e mjekëve.
Grupi hetimor po punon për të sqaruar dinamikën dhe shkaqet e aksidentit, duke verifikuar rrethanat e përplasjes, shpejtësinë, kushtet e rrugës dhe çdo element tjetër që mund të ketë kontribuar në këtë ngjarje.
Shumica e njerëzve në orët e aksidentit ishin ende duke festuar ndërrimin e viteve, por kjo ngjarje e rëndë e ka kthyer hyrjen në vitin 2026 në një lajm zie për Tepelenën dhe për familjet e tre viktimave.