BE publikon raportin: 25% e aksidenteve rrugore lidhen me konsumin e alkoolit
Sipas vlerësimeve të Komisionit Evropian, 25% e të gjitha vdekjeve nga aksidentet rrugore në të gjithë Bashkimin Evropian janë të lidhura me konsumin e alkoolit. Të drejtuarit e automjeteve nën ndikimin e alkoolit është një nga tre shkaktarët kryesorë të vdekjeve, së bashku me shpejtësinë e tepruar dhe mospërdorimin e rripit të sigurisë.
Vlerësohet se rreth 6.500 vdekje mund të parandalohen çdo vit nëse të gjithë drejtuesit e automjeteve do të respektonin ligjin dhe nuk do të drejtonin pasi kanë konsumuar alkool.
Europa shquhet si rajoni me konsumimin më të lartë të alkoolit në botë. Mesatarja evropiane prej 9,2 litra alkool të pastër të konsumuar për person në vit është një tregues domethënës i kësaj situate, megjithatë, ajo fsheh dallime të konsiderueshme mes vendeve anëtare, sipas të dhënave nga Këshilli Evropian për Sigurinë e Transportit. Vende si Malta, Norvegjia dhe Suedia regjistrojnë nivele më të ulëta të konsumit të alkoolit në krahasim me Estoninë, Republikën Çeke dhe Irlandën.
Alkooli, edhe në sasi të vogla, ndikon negativisht në gjendjen e qetësisë së drejtuesit të automjetit. Efektet te njeriu janë të shumëllojshme: nga shtypja e ndjeshmërisë pas konsumimit të sasive të mëdha të alkoolit, te dobësimi i aftësive njohëse pas konsumimit të sasive të vogla. Në shumë raste, alkooli dëmton aftësinë për të drejtuar, edhe kur nivelet e tij në gjak janë nën limitet e lejuara që janë në fuqi në disa vende të BE-së.
Drejtuesit që kanë konsumuar alkool rrezikojnë shumë më tepër të përfshihen në aksidente krahasuar me ata që nuk kanë alkool në gjak.