“`html
Ministri Malaj: Akti Normativ i Buxhetit 2025, Rishpërndan 300 Milionë Euro Fonde të Papërdorura
Ministri i Financave, Petrit Malaj, gjatë seancës së sotme parlamentare, prezantoi ndryshimet kryesore të buxhetit për vitin 2025, të cilat miratohen përmes një akti normativ.
Sipas ministrit Malaj, këto ndryshime sigurojnë:
- Mbështetje buxhetore për familjet me Ndihmë Ekonomike dhe Personat me Aftësi të Kufizuar, që arrin në 25.6 miliardë lekë, duke përfshirë fondin për bonusin e fundvitit.
- Një fond prej 11.8 miliardë lekësh për kategorinë e pensionistëve (indeksim + bonus).
“Në një kuadër ekonomik që kërkon kujdes dhe balancë në vendimmarrje, ne kemi zgjedhur të mbështesim ato shtresa të shoqërisë që kanë më shumë nevojë,” deklaroi ministri Malaj. Përmes këtij Akti Normativ, synohet:
- Transferimi i të gjitha fondeve të papërdorura gjatë vitit 2025 nga ministritë apo institucionet buxhetore në llogarinë e mbështetjes së pensionistëve në Bankën e Shqipërisë, fonde këto që do të përdoren me Vendim të Këshillit të Ministrave.
- Mbështetja e shtresave në nevojë (familjet me Ndihmë Ekonomike dhe Personat me Aftësi të Kufizuar).
- Rialokimi i kursimeve të evidentuara gjatë periudhës janar-nëntor 2025 drejt programeve me performancë më të lartë.
- Një shpërndarje e brendshme e fondeve me efekt neutral në deficit, me qëllim rritjen e efikasitetit dhe përmirësimin e zbatimit të projekteve.
Ministri Malaj theksoi se ky akt normativ synon rishpërndarjen e rreth 30 miliardë lekë kursimeve të evidentuara, për realizimin sa më të plotë të shpenzimeve publike në nivel vjetor, duke ruajtur të pandryshuar deficitin buxhetor për vitin 2025, në nivelin e planifikuar prej 61.64 miliardë lekë.
Ndër alokimet kryesore për zërin e shpenzimeve koherente, ministri Malaj veçoi:
- Transferimin e 150 milionë eurove në llogarinë e pensionistëve në Bankën e Shqipërisë.
- 2 miliardë lekë shtesë për financimin e kërkesave të fermerëve në skemën e bujqësisë.
- Mbështetjen financiare për disa kategori në nevojë, në masën 15,000 lekë (150 euro) për rreth 148,500 përfitues të familjeve me Ndihmë Ekonomike dhe Personat me Aftësi të Kufizuar, si dhe kujdestarët e tyre, me një efekt financiar prej 2.23 miliardë lekë (22.3 milionë euro). Sipas të dhënave, bonusi për familjet me Ndihmë Ekonomike ka realizim në masën 98.4%, ndërsa për personat me Aftësi të Kufizuar në masën 99.5%, duke pritur ende pagesa që janë në procesim.
- Parashikimin e transferimit të të gjithave fondeve të papërdorura në mbyllje të buxhetit 2025 në llogarinë e mbështetjes së pensionistëve në Bankën e Shqipërisë. Nga një vlerësim paraprak, shuma që minimalisht do të kalojë në këtë llogari është rreth 15 miliardë lekë (ose 150 milionë euro). Ky mekanizëm synon të krijojë hapësira të qëndrueshme për mbështetjen e pensionistëve, duke ruajtur transparencën dhe kontrollin, pa rrezikuar ekuilibrat fiskalë.
- Financimin shtesë për fermerët në masën rreth 2 miliardë lekë, me qëllim mbulimin e të gjithë kërkesave të aplikantëve që plotësojnë kriteret e përfitimit për vitin 2025.
Në total, fondi i alokuar për vitin 2025 për fermerët arrin në 6.4 miliardë lekë, krahasuar me 5.3 miliardë lekë në vitin 2024. Realizimi i fondit për skemat mbështetëse është 90%, ndërsa për kompensimin e naftës është në masën 93%, duke pritur ekzekutimin e plotë të pagesave.
Gjithashtu, janë bërë alokime shtesë:
- 1.76 miliardë lekë për Ministrinë e Shëndetësisë dhe Mbrojtjes Sociale, për mbulimin e nevojave për furnizimin me medikamente në QSUT dhe spitale të tjera.
- 1.3 miliardë lekë për Ministrinë e Brendshme, për mbulimin e shpenzimeve të Policisë së Shtetit për kompensimin ushqimor, orët jashtë orarit, dietat gjatë sezonit intensiv turistik, si dhe shlyerjen e detyrimeve nga vendimet gjyqësore të IKMT-së.
- 847 milionë lekë për Ministrinë e Turizmit, Kulturës dhe Sportit, për organizimin e aktiviteteve sportive me karakter kombëtar dhe ndërkombëtar.
“`