“`html
“Albcontrol” heq nga pronësia “Air Albania”-n e falimentuar, ia kalon Ministrisë së Ekonomisë
Shoqëria shtetërore “Albcontrol”, e cila menaxhon trafikun ajror, nuk do të jetë më aksionere në kompaninë e fluturimeve “Air Albania”. Sipas një njoftimi në fletoren zyrtare, Këshilli i Ministrave ka vendosur që kuotat e kapitalit, në masën 10% (dhjetë për qind), që zotërohen nga shoqëria “Albcontrol”, sh.a., në shoqërinë “Air Albania” sh.p.k., transferohen tek Ministria e Ekonomisë dhe Inovacionit.
Me transferimin e kuotave, Ministria e Ekonomisë dhe Inovacionit ushtron të gjitha të drejtat dhe detyrimet që rrjedhin nga cilësia e ortakut në shoqërinë “Air Albania” sh.p.k.
“Air Albania” u themelua zyrtarisht më 16 maj 2018 si një partneritet publik-privat mes Shqipërisë dhe Turqisë. Linja ajrore kishte si aksioner kryesor kompaninë turke Turkish Airlines (49,12%), ndërsa aksionet e mbetura ndaheshin mes ndërmarrjes shtetërore shqiptare “Albcontrol” (~10 %) dhe një kompanie private shqiptare, MDN Investment (~41 %).
Kompania, e cila u promovua gjerësisht nga qeveria, kishte plane ambicioze për zgjerimin e destinacioneve në Europë, me linja drejt Italisë dhe Britanisë, të cilat u realizuan përkohësisht, si dhe plane për destinacione më të largëta, deri në SHBA, siç u reklamua nga Kryeministri Rama një vit më parë gjatë një takimi me diasporën në SHBA.
Megjithatë, në nëntor të vitit të kaluar, “Air Albania” filloi të përballej me probleme. Turkish Airlines njoftoi se vendosi të shesë gjithë pjesën e saj prej 49% në “Air Albania”. Një javë më pas, Turkish Airlines bllokoi shitjen e biletave tranzit përmes “Air Albania”, duke detyruar ata që kishin blerë bileta tranziti të udhëtonin drejt Stambollit përmes Podgoricës ose Prishtinës. Këtu filluan dhe problemet për operatorin shqiptar.
“Air Albania” filloi të anulonte fluturimet drejt Stambollit. Ndërkohë, Turkish Airlines njoftoi në janar se do të nisë fluturimet direkte nga Tirana, duke spostuar përfundimisht “Air Albania”, e cila tashmë duket se ka mbetur më shumë si një emër në pronësinë e Ministrisë së Ekonomisë.
“Air Albania” nuk ka dorëzuar kurrë bilanc. Sipas të dhënave nga Tatimet, qarkullimi vjetor i kompanisë ka qenë 4-5 miliardë lekë në vit, ndërsa operatori ka rezultuar gjithmonë me humbje. Kjo situatë e ka kthyer atë sot në një shoqëri praktikisht të falimentuar dhe ka bërë që Turkish Airlines ta braktisë atë.
“`