Në gjykatën e Posaçme, gjatë vazhdimit të gjykimit për dosjen “Plumbi i Artë”, Erjon Alibej ka pranuar përfshirjen e tij direkte në një seri vrasjesh mafioze. Sipas dëshmisë së tij, Alibej ka deklaruar se ka qenë financues në vrasjen e Dorjan Shkozës dhe pjesëmarrës në vrasjet e Besian dhe Viktor Haxhia, Emiljano Ramazit, Regis Runajt dhe Bujar Çelës.
Motivi kryesor i atentatit ndaj Dorjan Shkozës, sipas Alibejt, ka qenë hakmarrja për vrasjen e familjarëve të tij. Ai ka theksuar se Nuredin Dumani, një person kyç në këtë dosje, i ka dhënë informacionin se Shkoza ishte i përfshirë në ekzekutimin e familjarëve të tij. Alibej ka shprehur besimin tek Dumani, pasi të dhënat e tij përputheshin me rrethanat.
Alibej gjithashtu ka konfirmuar dënimin e mëparshëm për trafik droge, nga i cili ishte liruar në vitin 2013. Ai ka përmendur se kishte qenë pjesë e një grupi të dënuar për këtë çështje, përfshirë edhe vëllain e tij të ndjerë. Ai ka shpjeguar se dëshira për të mundur Talo Çelën ka qenë një nga arsyet kryesore për vrasjen e Dorjan Shkozës.
Lidhur me vrasjen e Anxhelo Avdisë, Erjon Alibej ka deklaruar se e ka marrë vesh nga televizori dhe se nuk kishte dëgjuar më parë për të. Ai ka shtuar se Nuredin Dumani i kishte thënë se Avdia ishte pjesë e grupit kundërshtar të Talo Çelës.
Përdorimi i Enchro Chatin, sipas Alibejt, ka filluar rreth viteve 2016-2017, që kur produkti u hodh në treg.