Alpinist austriak shpallet fajtor për vrasje nga pakujdesia pas vdekjes së partneres në mal
Një alpinist austriak, i identifikuar si Thomas P., është shpallur fajtor për vrasje nga pakujdesia pas vdekjes së partneres së tij gjatë një ngjitjeje dimërore në malin Grossglockner, maja më e lartë e Austrisë. Si pasojë, ai është dënuar me pesë muaj burg dhe një gjobë prej 9,600 eurosh.
Viktima, Kerstin G., humbi jetën në janar 2025 nga hipotermia.
Gjyqtari Norbert Hofer deklaroi se i pandehuri ishte alpinist me përvojë, por partnerja nuk kishte eksperiencën e nevojshme për kushtet e ashpra dimërore dhe çifti duhej të ishte kthyer mbrapsht.
Sipas dëshmive, Kerstin u gjet pa doreza në temperaturë -8°C me erë të fortë, kushte që krijonin ndjesi rreth -20°C.
Prokuroria argumentoi se Thomas, si më me përvojë, ishte përgjegjës për vendimet dhe nuk kërkoi ndihmë në kohë. Ai telefonoi autoritetet vetëm pas mesnate dhe më pas vazhdoi ngjitjen duke e lënë atë pas.
Thomas P. i ka mohuar akuzat, duke thënë se situata ishte stresuese dhe e paparashikueshme, ndërsa mbrojtja këmbëngul se bëhej fjalë për një aksident tragjik, jo për neglizhencë.