Ambasadori amerikan në Francë kërkoi leje për të vizituar ish-presidentin Nicolas Sarkozy në burg, gjatë periudhës së shkurtër të paraburgimit të këtij të fundit. Vendimi për ta lejuar takimin u mor nga Gjykata e Apelit në Paris, sipas të dhënave të saj.
Megjithatë, takimi nuk u realizua kurrë, konfirmoi një burim pranë Sarkozy. Ai shtoi se ambasadori, Charles Kushner, dhe ish-presidenti u takuan më vonë, jashtë ambienteve të burgut, sipas informacioneve të Reuters.
Nicolas Sarkozy, i cili drejtoi Francën nga viti 2007 deri në 2012, u lirua muajin e kaluar pasi kaloi tre javë në burg, ndërsa ai apelon një dënim për komplot, të lidhur me mbledhjen e fondeve nga Libia. Ish-presidenti ka mohuar vazhdimisht të gjitha akuzat.
Charles Kushner, djali i të cilit, Jared, është i martuar me Ivanka Trump, vajzën e ish-presidentit amerikan Donald Trump, ka qenë subjekt i komenteve që nga ardhja e tij në Paris si ambasador në fillim të vitit. Vetë Kushner ka vuajtur më parë një dënim me burg në SHBA për dhurime të paligjshme në fushatë dhe evazion fiskal, mes akuzave të tjera. Në vitin 2020, ai u fal nga presidenti Trump.
Arsyet e kërkesës së Kushner për të takuar Sarkozy nuk janë bërë të ditura. Megjithatë, ish-presidenti francez u vizitua në burg edhe nga ministri francez i Drejtësisë, Gerald Darmanin.
Një burim pranë Sarkozy refuzoi të jepte detaje të mëtejshme, duke theksuar vetëm se ish-presidenti planifikon të shkruajë rreth këtij episodi në librin e tij të ardhshëm, me titull “Ditari i një të Burgosuri”, i cili pritet të publikohet javën e ardhshme.
Në gusht, Kushner u thirr në Ministrinë e Jashtme franceze pas publikimit të një letre të hapur drejtuar presidentit Emmanuel Macron, ku ai pretendonte se Franca nuk kishte bërë sa duhet për të frenuar dhunën antisemitike. Në shtator, kur një gjykatë në Paris vendosi që Sarkozy duhet të burgosej, ish-kreu i shtetit francez deklaroi se vendimi minonte shtetin e së drejtës dhe besimin e qytetarëve te drejtësia.