“Të mbrojmë kufijtë dhe të gjurmojmë elementët e dhunshëm” – Ambasada e SHBA: Njësia e Antiterrorit është pajisur me dronët më të fundit amerikanë
Ambasada e Shteteve të Bashkuara në Tiranë ka njoftuar, përmes një postimi në rrjetet sociale, se Njësia e Antiterrorit pranë Policisë së Shtetit do të pajiset me dronët më të fundit të prodhimit amerikan.
Sipas ambasadës, këta dronë janë të pajisur me teknologji të avancuar të imazheve termike, çka mundëson monitorim të vazhdueshëm si gjatë ditës ashtu edhe gjatë natës. Ky investim synon të rrisë ndjeshëm kapacitetet operacionale të Policisë së Shtetit, veçanërisht në fushën e kontrollit të territorit dhe forcimit të sigurisë kufitare.
Përdorimi i kësaj teknologjie pritet gjithashtu të ndihmojë në identifikimin dhe gjurmimin e elementëve të dhunshëm, duke përmirësuar kështu reagimin e strukturave ligjzbatuese në situata të ndryshme sigurie.
Ambasada amerikane thekson se mbështetja ndaj institucioneve shqiptare në fushën e sigurisë mbetet një prioritet, duke synuar rritjen e standardeve dhe eficiencës në luftën kundër kërcënimeve të ndryshme.