Presidenti i Kroacisë Anulon Samitin Brdo-Brijon, Shkak Aleksandër Vuçiç
Presidenti i Kroacisë, Zoran Milanoviç, ka anuluar samitin e shefave të shteteve të Ballkanit Perëndimor me Kroacinë dhe Slloveninë. Ky samit ishte planifikuar të mbahej në muajin maj në ishullin kroat Brijoni.
Presidenti Milanoviç ka deklaruar se arsyeja e anulimit është mungesa e kushteve për ftesën e presidentit të Serbisë, Aleksandër Vuçiç, për shkak të deklaratave të tij të fundit.
Sipas njoftimit të zyrës së Presidentit të Republikës së Kroacisë, të cituar nga “Jutarnji list”, “Prononcimet politike dhe veprimet e ditëve dhe javëve të fundit të presidentit të Serbisë Aleksandër Vuçiç janë në kundërshtim të plotë me qëllimet e Procesit Brdo-Brijoni, ato i dëmtojnë raportet ndërshtetërore dhe rrezikojnë paqen dhe stabilitetin në rajonin e Evropës Juglindore. Presidenti Milanoviç është i mendimit se në rrethanat e tilla nuk ekzistojnë kushtet dhe nuk është e mundshme ardhja e presidentit të Serbisë, Aleksandër Vuçiç në Kroaci”.
Samiti i fundit Brdo-Brijon u zhvillua në vjeshtë të vitit të kaluar në Tiranë, ku morën pjesë të gjithë presidentët e vendeve të rajonit, përfshirë edhe presidentin e Serbisë, Vuçiç.