“`html
Një nga përfaqësuesit e gjyqtarëve italianë, ish-gjyqtari Dino Tomasi, ka komentuar në emisionin javor “Open VAR” në “DAZN” vendimet më të diskutueshme të fundjavës në Serie A. Vëmendja kryesore ishte te ndeshjet e Napolit dhe Milanit, të cilat u shoqëruan me polemika dhe akuza për gabime arbitrare.
Tomasi fillimisht foli për penalltinë e anuluar Hojlund në ndeshjen Atalanta-Napoli. Ai theksoi se vendimi ishte absolutisht korrekt, pasi nuk kishte faull nga mbrojtësi i Atalantës. Sipas tij, Hojlund kërkonte kontaktin, ndërsa mbrojtësi, Hien, ishte i ndalur. “Kifi është i pozicionuar mirë, ka një ndjesi të gabuar dhe e kupton menjëherë para monitorit. Ne i japim shumë rëndësi faktit që arbitri të jetë në qendër të vëmendjes dhe këtu ai ka bërë një vlerësim fushe të gabuar,” u shpreh ai.
Lidhur me golin e anuluar napolitanëve, Tomasi e cilësoi si një “përplasje trup me trup” dhe shumë pak për t’u konsideruar faull. Ai shtoi se mbrojtësi i Atalantës kërkonte kontaktin me kundërshtarin dhe se ky ishte një gabim fushe. Përsa i përket arsyes pse VAR nuk e thirri arbitrin, Tomasi tha se të dyja palët (arbitri dhe VAR) kanë pasur të njëjtin vlerësim, duke parë një mbajtje. Megjithatë, ai vuri në dukje se vendimi i fushës ishte më i rëndësishëm dhe në këtë rast ishte i gabuar. “Nëse do të kishte qenë korrekt, nuk do të kishim pasur këto problematika,” përfundoi ai për ndeshjen Atalanta-Napoli.
Nga ana tjetër, Tomasi nuk dha të drejtë pretendimeve të Milanit për ndeshjen ndaj Parmës dhe golit të Troilo. Ai sqaroi se lojtari i Parmës ishte plotësisht i ndalur, nuk bëri asnjë lëvizje drejt portierit të Milanit dhe nuk e pengoi atë në dalje, duke pasur të drejtë të pozicionohej aty. “Verifikimi në fushë është korrekt, nuk ka faull,” tha ai. Përsa i përket golit të Troilo, ai e konsideroi atë absolutisht të rregullt, duke theksuar se ai i “vjedh kohën” Bartesagit, i cili nuk kërceu. “Është e drejtë të jepej goli,” përfundoi ai.
“`