Armëpushimi Izrael-Hamas në pikëpyetje, të dërguarit e SHBA në takim me Netanyahun për të rikthyer palët te diplomacia
Të dërguarit amerikanë u takuan sot me kryeministrin izraelit, Benjamin Netanyahu, me qëllim që të bindnin Izraelin dhe Hamasin që të riktheheshin në rrugën e duhur me planet e armëpushimit në Gaza. Ky takim vjen pas një përshkallëzimi të konfliktit gjatë fundjavës, i cili kërcënoi të prishte marrëveshjen e armëpushimit.
Izraeli dhe Hamasi janë angazhuar sërish ndaj planit të armëpushimit të nxitur nga Presidenti i SHBA-së, Donald Trump, që nga përshkallëzimi i tensioneve të së dielës. Gjatë këtij përshkallëzimi, një sulm palestinez vrau dy ushtarë izraelitë, duke shkaktuar më pas një bombardim izraelit që la të vdekur të paktën 28 persona në Gaza.
Megjithatë, me fazat e para të armëpushimit të tronditura nga shpërthime të përsëritura dhune, përfshirë ato të së hënës, mbetet e paqartë nëse Shtetet e Bashkuara do të jenë në gjendje të ruajnë presionin mbi të dyja palët dhe të mbajnë vrullin për t’i dhënë fund konfliktit.
Të dërguarit amerikanë, Steve Witkoff dhe dhëndri i Trump, Jared Kushner, pritej të ushtronin presion për forcimin e armëpushimit dhe më pas të fillonin bisedimet për fazën tjetër, më të vështirë, të planit 20-pikësh gjatë vizitës së tyre.
Zëvendëspresidenti i SHBA-së, JD Vance, gjithashtu do të vizitojë Izraelin të martën, sipas autoritetit të aeroporteve të Izraelit.