Korçë/ Shpërndante lëndë narkotike, në pranga 50-vjeçari
Një 50-vjeçar është arrestuar dhe një tjetër person është shpallur në kërkim për shpërndarje të lëndëve narkotike në qytetin e Korçës. Policia njoftoi se 50-vjeçarit të arrestuar iu gjet një pako me rreth 104 gramë kanabis.
Në kërkim është shpallur bashkëpunëtori i tij, 37-vjeçari K. M., i njohur gjithashtu si A. M.
Njoftimi i Policisë:
Finalizohet operacioni policor i koduar “Drenova”. Shpërndante lëndë narkotike, kapet dhe vihet në pranga 50-vjeçari. Shpallet në kërkim bashkëpunëtori i 50-vjeçarit dhe vijon puna për kapjen e tij. Sekuestrohet një pako me lëndë narkotike.
Specialistët për Hetimin e Narkotikëve në DVP Korçë, në zbatim të planit të masave të hartuar për vitin 2026, me objektiv parandalimin dhe goditjen e veprimtarisë kriminale në fushën e narkotikëve, bazuar edhe në informacionet e marra në rrugë operative për një shtetas që shpërndante lëndë narkotike në zonën e Korçës, organizuan dhe finalizuan operacionin policor të koduar “Drenova”.
Në kuadër të operacionit u bë kapja dhe arrestimi në flagrancë i shtetasit M. M., 50 vjeç, banues në Drenovë, Korçë. Në momentin e kapjes, këtij shtetasi iu gjet dhe sekuestrua, në cilësinë e provës materiale, një pako me rreth 104 gramë lëndë narkotike cannabis sativa.
Nga hetimet rezultoi se 50-vjeçari bashkëpunonte me shtetasin K. M., alias A. M., 37 vjeç, banues në Korçë, i cili u shpall në kërkim dhe vijon puna për kapjen e tij.
Në bashkëpunim me Prokurorinë vijon puna për dokumentimin e plotë ligjor të veprimtarisë kriminale të këtyre shtetasve. Materialet iu referuan Prokurorisë pranë Gjykatës së Juridiksionit të Përgjithshëm Korçë, për veprime të mëtejshme.