Arrestimi i vëllait të Mbretit Charles, BBC sqaron pikat e paqarta
Policia britanike arrestoi të enjten Andrew Mountbatten-Windsor, vëllain e Mbretit Charles, nën dyshimin për “shkelje të detyrës publike”. Ai u mor në pyetje në një stacion policie në Norfolk dhe më pas u lirua “nën hetim”, pa masa kufizuese si ndalim udhëtimi apo orë policore.
Andrew ka mohuar vazhdimisht çdo shkelje.
Çfarë do të thotë “liruar nën hetim”?
Kjo do të thotë se ai nuk është akuzuar zyrtarisht, por hetimi vazhdon dhe mund të thirret sërish për t’u marrë në pyetje. Vendimi për ngritjen ose jo të akuzës do të merret nga Prokuroria e Kurorës (CPS) dhe Policia e Thames Valley, proces që mund të zgjasë disa javë.
Kontrolle në rezidencat e tij
Policia konfirmoi se ka kryer kontrolle në prona në Norfolk dhe Berkshire, përfshirë Royal Lodge në Windsor Great Park, ku Andrew ka jetuar deri vonë. Sipas ish-zyrtarëve të policisë, arrestimi u jep autoriteteve të drejtën të sekuestrojnë pajisje elektronike, dokumente dhe prova të tjera të mundshme.
Pse u arrestua?
Arrestimi lidhet me një hetim mbi ndarjen e materialeve konfidenciale dhe lidhjet e tij me të ndjerin Jeffrey Epstein. Dyshimet përfshijnë shpërndarje raportesh nga vizita tregtare dhe dokumente të ndjeshme. Nuk dihen ende detajet e plota të akuzave.
Çfarë është “shkelja e detyrës publike”?
Është një vepër penale që kërkon provë se një zyrtar publik ka vepruar me dashje në kundërshtim me detyrën, duke abuzuar me besimin publik dhe pa justifikim të arsyeshëm.
A mbetet në radhën e trashëgimisë?
Andrew është i teti në radhën për fronin, por praktikisht ka shumë pak gjasa të bëhet mbret. Heqja e tij nga radhët e trashëgimisë do të kërkonte ligj të posaçëm nga Parlamenti dhe miratim nga vendet e Komonuelthit.
Reagimi i Mbretit
Mbreti Charles deklaroi se “ligji duhet të ndjekë rrugën e vet” dhe se autoritetet do të kenë mbështetjen e plotë të familjes mbretërore gjatë hetimit. Hetimi vazhdon.
Përgatiti në shqip ©LAPSI.AL