Arrestohet pas nëntë vitesh i dyshuari për rastin famëkeq “Putney Pusher” në Londër
Policia britanike ka arrestuar një bankier multimilioner 44-vjeçar, me prejardhje aristokratike, i cili dyshohet të jetë autori i rastit të njohur si “Putney Pusher”. Ky incident tronditi opinionin publik në Britaninë e Madhe në vitin 2017.
I dyshuari u arrestua të hënën, më 15 qershor, në rezidencën e tij luksoze në perëndim të Londrës. Ai po mbahet nën dyshimin për tentativë lëndimi të rëndë trupor.
Arrestimi lidhet me një ngjarje të ndodhur më 5 maj 2017 në Urën Putney. Një person, duke vrapuar, shtyu pa ndonjë provokim një këmbësore, duke e hedhur drejt korsisë së autobusëve, pikërisht në momentin kur po afrohej një autobus me dy kate.
Incidenti u regjistrua nga kamerat e sigurisë dhe pamjet u shpërndanë gjerësisht në media dhe rrjete sociale. Gruaja arriti t’i shpëtonte tragjedisë falë reagimit të shpejtë të shoferit të autobusit, i cili frenoi në kohë dhe shmangu përplasjen.
Sipas hetimeve, personi që shtyu gruan vazhdoi rrugën pa u ndalur për të ofruar ndihmë. Ai më vonë dyshohet se kaloi sërish pranë vendit të ngjarjes, por injoroi kërkesat e gruas dhe kalimtarëve për të qëndruar në vend.
Rasti kishte shkaktuar një debat të gjerë publik, veçanërisht për shkak të vonesës në publikimin e videos së sulmit, e cila doli në dritë rreth tre muaj pas incidentit. Ekspertët ligjorë kishin paralajmëruar se kjo mund të vështirësonte identifikimin e autorit, duke i mundësuar atij t’i shmangej drejtësisë për vite me radhë.
Hetimi u mbyll zyrtarisht në vitin 2018 për shkak të mungesës së provave të reja. Megjithatë, informacione të fundit çuan në rihapjen e çështjes, duke rezultuar në arrestimin e të dyshuarit pas nëntë vitesh.
Sipas mediave britanike, i arrestuari është një ish-ushtar dhe bankier i njohur. Autoritetet kanë bërë të ditur se hetimet vijojnë dhe se çështja mbetet ende e hapur.