Arrestohet “Vrasësi serial i hamsterëve” në Japoni pas masakrës në një hotel
Një burrë në veri të Japonisë është arrestuar për herë të dytë, pasi dyshohet se ka vrarë rreth 30 hamsterë në një hotel. Ky arrestim vjen vetëm disa muaj pasi ai ishte ndaluar për një rast të ngjashëm.
I dyshuari, i cili punon si mësues në një shkollë të mesme, thuhet se ka kryer këtë akt në fund të marsit, me ndihmën e një 20-vjeçareje. Sipas policisë, në telefonin e tij janë gjetur video të ngjarjes, si dhe mesazhe që duket se dëshmojnë planifikimin e saj. Një nga mesazhet e gjetura dyshohet se përmbante frazën: “Ku do të vrasim hamsterë dhe të argëtohemi?”
Burri ishte arrestuar edhe më parë në korrik, pasi dyshohej se kishte vrarë rreth 20 hamsterë në shkurt, në bashkëpunim me një grua 19-vjeçare.
Policia ka arrestuar gjithashtu edhe dy gratë dhe po vijon hetimet për të zbuluar nëse i dyshuari ka qenë i përfshirë edhe në raste të tjera të ngjashme.