Australi: Meta njofton heqjen e përdoruesve nën 16 vjeç nga Facebook dhe Instagram
Australët nën moshën 16 vjeç do të hiqen nga Facebook dhe Instagram duke filluar nga data 4 dhjetor, njoftoi gjiganti teknologjik Meta. Ky veprim vjen ndërsa Australia po përgatitet të zbatojë ligje gjithëpërfshirëse që ndalojnë adoleshentët nga mediat sociale.
Nga data 10 dhjetor, Australia do t’i detyrojë platformat e mediave sociale, duke përfshirë Facebook, Instagram dhe TikTok, të heqin përdoruesit nën moshën 16 vjeç, përndryshe do të përballen me gjoba të rënda.
Meta ka deklaruar se do të fillojë të heqë adoleshentët nga platformat e saj para se ndalimi të hyjë në fuqi. “Nga sot, Meta do t’i njoftojë përdoruesit australianë, për të cilët ka informacion se janë të moshës 13-15 vjeç, se do të humbasin aksesin në Instagram, Threads dhe Facebook,” thuhet në një deklaratë të Metës. “Meta do të fillojë të bllokojë llogaritë e reja nën 16 vjeç dhe të revokojë aksesin ekzistues nga data 4 dhjetori, duke synuar të heqë të gjithë personat e njohur nën 16 vjeç deri më 10 dhjetor.”
Meta sqaron se adoleshentët do të jenë në gjendje të hyjnë në llogaritë e tyre “pikërisht ashtu siç i lanë” sapo të mbushin 16 vjeç.
Më parë, kompanitë e mediave sociale i kanë përshkruar këto ligje si “të paqarta”, “problematike” dhe “të nxituara”. Meta ka shprehur sërish shqetësimet e saj. “Ne ndajmë qëllimin e Qeverisë Australiane për të krijuar përvoja online të sigurta dhe të përshtatshme për moshën, por shkëputja e adoleshentëve nga miqtë dhe komunitetet e tyre nuk është zgjidhja.”