A është Bajerni i Mynihut në prag të falimentimit? Ja çfarë thotë presidenti
Presidenti i klubit të Bajernit, Herbert Hainer, ka deklaruar se futbolli ka nevojë urgjente për një limitim të pagave të lojtarëve. Ai shprehet se, përndryshe, të gjitha klubet do të përballen me falimentimin, duke përfunduar edhe në atë mënyrë që lojtarët të mos fitojnë më aq mirë.
Hainer theksoi se Bajerni është një nga pak klube që vijon të gjenerojë fitime të rregullta, por shtoi se “po bëhet gjithnjë e më e vështirë” për ta ruajtur këtë situatë.
“Mendimi im i sinqertë është se duhet të vendoset një kufi mbi pagat e lojtarëve. Si do të implementohet kjo është një çështje më komplekse,” tha ai.
Presidenti i Bajernit argumentoi se yjet e futbollit dhe agjentët e tyre po fitojnë shuma të mëdha parash, ndërkohë që punëdhënësit e tyre po përballen me vështirësi financiare.
“Këta janë atletë të jashtëzakonshëm, pa dyshim. Por mbi të gjitha, klubi duhet të jetë në gjendje të vazhdojë të ekzistojë dhe të përmbushë përgjegjësitë e tij ndaj shoqërisë dhe punonjësve,” përfundoi kreu i Bajernit.